Atoqatigiittarneq tamatta pigivarput, uumaniassagatta

Ulrikka Holmip saqqummiinerani inuit 100-t missaanniittut peqataapput. (ass./foto: Johannes Ujo Müller)

 

Sisamanngormat Sexolog - atoqatigiinnermut tunngasunik immikkut ilisimasalik - Ulrikka Holm imminut paarinissaq qulequtaralugu KTI-p saqqummiisarfiani Sisimiormiorpassuit soqutiginneqalutik uummaarissumik peqataaffigisaanni saqqummiiffigai.
Qaammatini kingullerni kinguaassiutitigut nappaatit Sisimiuni annertuumik atugaanerat minnerunngitsumillu HIV-ertut amerliartornerat ilutigalugu Qeqqata Kommuniata atoqatigiinnermut tunngasunik ilisimasalik aggersarsimavaa.
Inuit 100-t missaanniittut KTI-p ataatsimiittarfiani saqqummiiffiusartumi uummaarissumik tunuarsimaarfiunngitsumillu ingerlanneqarpoq.
Atoqatigiinnermut atoqatigeeriaatsillu assigiinngitsut saqqummiuppai.

Porno pisuulluni timerput puigorsimavarput

Nunarsuartsinni pornoliortarnerup kinguneranik inuit timimikkut malussarissutsit sinneri puigorsimavaat, annerusumillu kinguaassiutit ukkatarineqarnerpaajulersimallutik.
- Annertunerpaaq timerput tamaat atornissaa immaqa eqqumaffigineqarneq ajorpoq. Tassanilu ineriartornermi takutippaa porno industri pilersinneqarmat atoqatigiinneq misigissusiiarneqarsimavoq, Ulrikka Holm oqaluttuarpoq.
Pornomi periuserineqartut malinniarneqarnerulersimapput aapparisap piumasai paasiniaqqaarnagit.

Inerneq timimut nukittorsaataavoq

- Atoqatigiinneq nuannertussaammat inertarpugut. Timitsinni assigiinngissutigut inertariaatsit suli amerliartorput. Inullu inissaguni qarasaata saavaniittoq qameqqaartariaqarpoq, tassa allanik atoqatigiinnermut tunngassuteqanngitsunik eqqarsaateqassanngilaq inerniaruni. Inertarnerlu inuup nammineq akisussaaffigaa. Inuk ineraangami timimi akiuussutissartai nukittorsartarpai, Ulrikka nassuiaavoq nangillunilu.
- Taamaammat pingaarutilerujussuuvoq ulloq allortarlugu inertarnissaq. Imaluunniit ullup pingajussaani aamma ajunngilaq.

Kinguaassiutigut sukaqattaartassavagut

Saqqummiinermi pingaaruteqartut ilaattut eqqaavaa kinguaassiutigut eqaarsaatittuartarnissaat, utoqqaliarsaalernermi nukeerussinnaaneri pissutigalugit. Arnani kinguaassiutit sukaqattaartarnissaat, soorlu quinermi qooq unitseqattaartarlugu nukkassarneqarsinnaapput. Taamaasiortanngikkaanni nukilaallillutik illiaq anillattalersinnaammat.
Angutit kinguaassiutaat aamma eqaarsaartinneqarsinnaavoq imminut pinnguarinikkut inilernermi quleriarlugu nunusaqattaariarlugu aatsaat inertarnikkut.

- Atoqatigiinneq peqqinnartoq pigissagaanni nuannersumiissaguttalu malussarissutsigut pingaarnerpaajupput. Ulluinnarsiutigingaaratsigu malussarissutsigut eqqarsaatigineq ajorpagut, tassaasut isigisagut, tusaasagut timorpullu attuuaneqarnissaa, oqarpoq Ulrikka Holm.

Mobiili timitsinniit pingaartinneruallaarparput

Timerput kinaassuserpullu paarineri ersarinngippallaarput. Paarilluarnerpaasarparput soorlu mobiili. Taamaattumik timerput paarilluarniarutsigu paasisimasariaqarpoq imminut aperaluni sooruna timera paarilluarniariga?
- Soorlu aappaqanngikkuma atoqatigisinnaasakka ilisimatittariaqarpakka sooq uanga imminut paarinissara pingaartinneriga. Taamaalilluni oqariartuutigut ersarinnerusumik oqaatigisinnaasariaqarpagut. Usuup puua sakkuinnaavoq, kisianni qanna misigissuseq ikittariaqarpara pingaartillugu paarinissara, oqarpoq atoqatigiinnermut tunngasunik immikkut ilisimasalik.

Saqqummiinermi peqataasut ilai apersortarput, soorlu atoqatigiinnermut aappariinnermullu tunngasut. Tamaasalu Ulrikkap akissuteqartittarpai siunnersuuteqartarlunilu.

Ulrikkap facebook-iata quppernerani inuit saaffiginnittarput arlaannik apeqqutissaqaraangamik, ullumikkullu saaffiginninnerusartut tassaanerarpai aappariit aappariinnerliortut.
Asanninneq, aappariinneq atoqatigiinnermullu tunngasunik oqaloqatiginnittarluni sullitaqartarpoq.

Qeqqata Kommuniata pilersaarutigaa Ulrikka Holm ukiup naannginnerani Sisimiunut tikiseqqinnissaa.


Ulrikka Holm 2010-mi ilinniakkani Sexolog - atoqatigiinnermut tunngasunik immikkut ilisimasalik - naammassisimavaa, Nunatsinnilu siullersaalluni taamatut ilinniagaqarluni. Saqqummiisarnini oqaloqateqartarninilu ilisimasani aallaavigalugit Nunatsinnut tulluarsarlugit ingerlattarpai.

 

sexolog sisimiuni 950px 02

- Mobiili paarilluarnerullugu pingaartinneruallaarparput, timerput kinaassuserpullu paarineri ersarinngippallaarlutik. (ass./foto: Johannes Ujo Müller)

 

sexolog sisimiuni 950px 03

Ulrikka Holm ukiup naannginnerani Sisimiunukaqqinnissaa pilersaarutaavoq. (ass./foto: Johannes Ujo Müller)