Aalanerusa meeqqagullu tapersersorlutigit

 

Sapaatiummat SAK-miuaqqat arsartartut angalanissaminnut katersillutik suliffeqarfinnik unammisaqattaartitsipput.
Arnat, angutit utoqqasaat inersimasullu immikkut unammisinneqarput, peqataasullu nuannisarsimanerarput. Suliffeqarfiit unammisaqattaartinneqartarnerat ukiut tamaasa pisarpoq. Tamatumuunali aaqqissuisut tassapput SAK meeqqat arsartartut. Sapaat ullaarnganiit meeqqat qulingiluanut sungiusaqqaarput, ullup qeqqarmallu arsaqattaartitsillutik aallartillutik. Arsartartuaqqat tamarmik aaqqissuussineq ingerlappaat, inersimasunillu ikiorteqarlutik ilai dommerioqataapput unamminerillu inernerinik nalunaarsuisarlutik. Ullaarnganiit unnukkut qulingiluanngoriartornerata tungaanut tunniusimallutik aaqqissuipput.

Nunanut allanut unammiartorusupput

Meeqqat sinnattorivaat nunarput qimallugu arsariarnissaq. Tamannali aatsaat pisinnaavoq angalanissamut aningaasartuutit matussusernissaannut aningaasanik katersaqarsimanissaq. Minnerpaamik Danmarkimut unammiarusupput, nunalli allat ornikkusuppaat, sulili sumorpiaq angalaniarnerlutik aaliangerneqarani.
- Neriuppugut aappaagu, taamaanngippat aappaaguaguussaaq. Nerioqaagulli aappaaguussaasoq. Island aamma eqqartorneqarpoq, kisianni siunertaavoq Kalaallit Nunaat qimallugu unammiartortinnissaaat, oqarpoq sungiusaasoq Hans Ole Kristiansen.
Arsartartut sapaatip akunneranut marloriarlutik timersortarfimmi sungiusartarput. Pingasunngornermi sisamanut sungiusartarput sapaammilu qulingiluanut akunnernik pingasuni sungiusartarlutik.
- Perorsaatigilluakkaminnik sapaatikkut ullaarnganiit timersortarfik ammaannariartoq nuannarineqarluartumik amerlasoorpassuullutik sungiusariartarput. Meeqqat sukkasoorujussuarmik ineriartortarmata malugisinnaavarput aamma taamaattoq. Taannalu uanga pissangagivara ukioq ataaseq, marluk tallimalluunniit eqqarsaatigigutsigit qanoq siuariartigissanersut assut pissanganarpoq, Hans Ole Kristiansen nassuiaavoq nangillunilu.
- Angajoqqaat kaammattorusuppakka meeqqatik aalatinnissaat pingaartissagaat, taannami pingaarnerpaajugami aalanissaq. Ullaakkullu makiaarlutik sungiusariartarnissaat tapersersorluartassagaat. Meeqqat oqaluuttarpakka imertortassaasi, peqqinnartutortassaasi naatitartortarlusilu. Nalunngilara angajoqqaat amerlasuut tassuuna aamma tapersersuisartut, kisianni amerlanerusinnaapput, sungiusaasoq kaammattuivoq.

Unammiuaartitsineq naammassilluarpoq

Arsaqataasoq ataaseq Peqqissaaviliaanneqarsimavoq seqquuminillu nukkilisimasoq oqaatigineqarpoq.
- Allamik ajoqusertumik takusaqanngilagut. Arsaannerit nuannersumik ingerlanneqarput. Mianersoqqussummik tunisisoqanngilaq anisitaasoqanngilaq, frispark-illu ikitsuaraapput. Unammeqataaniarlutik nalunaarnikut tamarmik arsaqataapput, oqarpoq sungiusaasooqataasoq Jens Karlsen.


Arnat inersimasut / utoqqasaat:

1. Nalunnguarfiup atuarfia
2. Knud Rasmussenip Højskolia
3. Minngortuunnguup atuarfia

Angutit utoqqasaat:

1. KNI A/S SAK
2. Brøndum/VVS Service
3. KTI

Angutit inersimasut:

1. KTI Young Boys
2. GUX
3. Blue Water / Sisimiut Sport

 

aalanerusa 950px 02

- Meeqqat aalasarnissaat, peqqinnartunik imigaqarlutillu nerisaqarnissaat ullaakkullu makiaarlutik sungiusariartarnissaat pingaaruteqarpoq. (ass./foto: Johannes Ujo Müller)

 

aalanerusa 950px 06

SAK meerartaanni sungiusaasoq Hans Ole Kristiansen. (ass./foto: Johannes Ujo Müller)

 

aalanerusa 950px 03

Arnani ajugaapput Nalunnguarfiup Atuarfia. (ass./foto: Jens Karlsen)

 

aalanerusa 950px 04

Utoqqasaani ajugaapput KNI A/S SAK. (ass./foto: KNI A/S)

 

aalanerusa 950px 05

Angutini inersimasut ajugaapput KTI Young Boys. (ass./foto: Jens Karlsen)