Johanne aqutsisullammattut nersornaaserneqarpoq

Johanne Jonathansen nersornaaserneqarami tussunngulluni oqaaseqarpoq. (ass./foto: GIF)

 

Arfininngormat Katuami Johanne Jonathansen Aqutsisuullammattut nersornaaserneqarpoq. Nunatsinni timersoqatigiiffiit Kattuffiata aaqqissugaanik KNR-TV-kkut Maligassiuisut Live 2018 toqqaannartumik aallakaatinneqarpoq.

Johanne Jonathansen 77-inik ukiulik Sisimiuni utoqqaat timersoqatigiiffianni siulittaasuuvoq. Ukioq mannalu KNUSTAS - Kalaallit Nunaanni Utoqqaat Suliunnaarnersiutillillu Timersortartut Ataatsimut Suleqatigiiffiat – Sisimiuni ingerlanneqarnerani pingaaruteqarluni aaqqissuussisuusimavoq. Aaqqissuussaq 175-inik peqataaffigineqartumi pilersaarusiorneqarluarsimavoq, hockey (floorball) assammik isikkamillu arsaannernik unammiuaarneqartaqarsimalluni.
Johanne Nuummi Katuami peqataavoq, toqqagaagamilu tussunngulluni oqaaseqarpoq.

- Kalerrinneqarama innersuussaasimallunga tupannikuuvunga. Unnuk manna tussunnguvunga, qutsavigaakkalu innersuussisimasut, qujanarujussuaq. Allamik oqarneq ajornaqaaq. Uiga, kinguaakka ilaqutannguakkalu uanga sulininnut tapersersuiuarsimasut tamaasa qutsavigaakka. Tamassinnut qujanarujussuaq. Qanorluunniit utoqqaatigigaluaraanni piumassuseqaraanni suliaq ingerlallugu nuannaralugulu ingerlasoqarsinnaasoq paasivara. Tamassinnut qujanaq, oqarpoq Johanne Jonathansen.

Qeqqata Kommunia nersorneqarpoq

Nersornaaserneqartut aamma ilagaat Qeqqata Kommunia 2018-imi suliffeqarfittut eqeersimaartutut toqqarneqarmat.
Nersornaasiisoqarnerani peqataapput Qeqqata Kommuniani borgmesteri Malik Berthelsen, kommunip direktøria Paneeraq Olsen kiisalu atuilluartuunissaq pillugu siunnersorti Kristina Würtz Poulsen.

joahnne nersornaasigaavoq 950px 02

Qeqqata Kommunia 2018-imi suliffeqarfittut eqeersimaartutut toqqarneqarluni nersornaaserneqarpoq. (ass./foto: Maligassiuisut)