HIV akiorniarneqalerpoq

(foto: Qeqqata Kommunia)

 

Qaammatit kingulliit marluk Sisimiuni HIV-mik tunillatsissimasut paasineqartut amerliartortut iliuuseqarfiginiarlugit Qeqqata Kommunia suligasuarluni qisuariarpoq.
Qeqqata Kommunia aningaasaliissuteqarnermigut suliniutissanik aallartitsinermini ilaatigut sexologi (atoqatigiinnermut immikkut ilisimasalik) Ulrikka Holm Sisimiunut tikisinneqarpoq Majoriamilu ilaatigiut suliffissaaleqisunut inuusuttunullu 15-18-it akornanni ukiulinnut sammisassaqartitsiartuutigaluni pikkorissaajartorpoq. Pikkorissarneq sapaatit akinnerini marlunni sivisussuseqassaaq, ilaatigut inuttut ineriartornermut atoqatigiinnermullu tunngasunut sammitinneqassalluni.

Paasititsiniaanerit ersarissut

HIV-ip akiorneqarniarnerani Ilaqutariinnermut kiffartuussivimmi pinaveersaartitsisut TV-kkut ussassaarutinik kinguaassiutitigut nappaatinut tunngasunik pinaveersaartitsissutissanik sananissaminnut pilersaaruteqarput. Innuttaasunik ataatsimiisitsinerit peqqissaavik kigutileriffillu suleqatigalugit ingerlanneqassasut ilisimatitsissutigineqarput.
- HIV-ip annertunerusumik tuniluunnissaralua unitsinneqarniassammat, HIV pillugu ajornartorsiutip ukkatarineqangaatsiarneqalernissaa Qeqqata Kommuniata kissaatigaa, innuttaasullu tamarmik imminnut kiisalu inoqatiminnut paarinerulernissaannik kaammattorusuppagut, tamannami akisussaaffik tamatsinniippoq, Qeqqata kommuniata nalunaarusiaani taama allapput.

Nakorsaaneq mianersoqqusivoq

HIV-mik tunillatsittoqarsimanera pillugu oktobarimi Sivdlek’ Nakorsaaneqarfik attavigisimavaa apeqqutigalugulu arlaatigut tamanna iliuuseqarfiginiarneqarnersoq. Sap. ak. sisamangajaat qaangiutereersullu nakorsaaneq tusagassiorfinnut nalunaaruteqarnermini innuttaasut HIV-imut tunillatsissinnaanerannik mianersoqqusivoq.
- HIV-ip tuniluunneranik annikitsumik nunarput eqqugaaqqippoq. Tamanna tuniluuttup siaruaannissaanik annertuumik ernumalersitsivoq. Tunillatsissinnaanermut sillimanissamik atoqateqarnermilu usuup puuanik atuinikkut isumanaatsumik atoqateqarnissamik, peqqinnissamut tunngatilligu oqartussat innuttaasunik tamanik kajumissaaripput, oqarpoq Nunatsinni nakorsaaneq Henrik L. Hansen.

Ullumikkumuugallartoq inuit tallimat HIV-imik tunillatsissimasut nassaarineqarput, sulilu siaruaassimanersoq paasiniarneqaleruttorluni. Tunillatsissimasut 20-it 40-ullu akornanni ukioqartut Sisimiuni attuumassuteqarput, arlallilli sinerissami sumiiffinni allaniipputtaaq.

- HIV-mik atoqatigiinnikkullu tuniluuttartunik nappaatinik allanik tunillatsissinnaaneq kissaataanngitsumillu naartulersinnaaneq pitsaaliniaraanni isumannaatsumik atoqatigiinneq periarfissatuaavoq. Peqqinnartumik isumannaatsumillu atoqatigiinneq siuarsarniarlugu inuiaqatigiit iluanni arlalitsigut annertuumik iliuseqarnissaq suli pisariaqarpoq, Henrik L. Hansen naggasiivoq.