Johanne Jonathansen innersuunneqartoq

Johanne Jonathansen Nunatsinni Timersoqatigiifiit Kattuffianniit sianerfigitippoq Faxe Kondi Legatinut toqqaanissamut innersuunneqarluni. (ass./foto: Qeqqata Kommunia)

 

Johanne Jonathansen Nunatsinni Timersoqatigiifiit Kattuffianniit sianerfigitippoq Faxe Kondi Legatinut toqqaanissamut aqutsisullammattut innersuunneqarluni.
Sisimiormioq 77-inik ukiulik Johanne Jonathansen innersuunneqarluni toqqagaagami tupappoq.
- Kalerrinneqarama tupappunga, tupattorujussuuvunga ilimasunnginnermik. Tupaqqaalaariarlunga akuersivunga taamatut innersuunneqarsimaninnik. Tulluusimaarutigaara nukissannillu tunineqarpunga. Aamma nuannaarpunga Sisimiuninngaanniit taamatut saqqummertoqartussaammat, uangaasimanngikkaluarpalluunniit Sisimiormiuuppat tulluusimaarutigisorujussuusimassagaluarpara, oqarpoq Johanne Jonathansen.

Johannep innersuunneqarluni toqqagaasimanini nammineq peqqutaa sunaanersoq nalornissutigeqqaarpaa.
- Apeqquterujussuaq. Akiuminaatsippara taanna, kisianni tunngavia ilimagaara aasaq Sisimiuni utoqqaat timersoqatigiiffii katerisimaarneranni aqutsisutut inissisimanera maluginiarneqarsimasoq, innersuunneqartoq oqaluttuarpoq.

Inuusuttut kajumissaarpai

Johanne Sisimiuni Utoqqaat sulisinnaajunnaarnersiutillillu timersoqatigiiffianni Eqartoq-mi siulittaasuuvoq, pisinnaajuartillunilu ingerlattuarusullugu.
- Inuusuttunik pikkorissorpassuaqarmat, inuusuttut kajumissaarusuppakka aalajaallutik akisussaassutsimillu tigusillutik siunissami ingerlatsiumaartut. Taamaasilluni Nunatsinni aamma peqatigiiffiit ingerlalluarlutillu siunissarissaarnerussammata, Johanne kajumissaarivoq.

Legatinut toqqarneqartut Maligassiuisut show-ip ingerlanerani Nuummi Katuami novembarip 17-ani suaarutigineqassapput, tamannalu toqqaannartumik KNR-TV-kkut aallakaatinneqassaaq. Toqqaasoqarnissaanut Johanne Jonathansen Nuummut qaaqqusaavoq.
2018-imi Faxe Kondi Grønland legatinut innersuussat tassaapput:

 

Ukioq manna aqutsisullammak

• Anni Olesen Damgaard
• Johanne Jonathansen
• Lukas Hansen

 

Ukioq manna sungiusaasuullammak

• David Bror Janussen
• Henrik Ottosen
• Tom Ostermann-Søholm

 

Ukioq manna timersullammak

• Najaaja Anja Lyberth
• Jens-Frederik Nielsen
• Belinda Camilla Voigt Lange'

 

johanne jonathansen 950px 02

Johanne Jonathansen Sisimiuni Utoqqaat sulisinnaajunnaarnersiutillillu timersoqatigiiffianni Eqartoq-mi siulittaasuuvoq, pisinnaajuartillunilu ingerlattuarusullugu. (ass./foto: Johannes Ujo Müller)