Energidrikkit navianartuusut nakorsap mianersoqqussutigai

 

Imeruersaatigineqarluartut ilaat energidrikkit imigarisarukku eqqarsarluaqqittariaqalerputit. Eqeersaatitut amerlasuut atugarisagaat naatsorsuutigisamiit navianarluinnartuunera amerlasuut ilisimagunanngilaat.
Fødevarestyrelsip tamanna pillugu misissuinerminni paasivaat timimut sunniuterpassuaqartartoq.
Misissuinermi 10-it -35-illu akornanni ukiullit katillugit qallunaat 3.682-it peqataasimasuni 42 procentii timimikkut sunniuteqartoq malugisimavaat.

Taamaammat ullutsinni pisiniarfinni pisiarilluarneqartut ilaat energidrikkit timimut navianaateqatuusut uummatip nakorsaata mianersoqqussutigivaa.
- Energidrikkitortartut akornanni, inuunerminnik navianartorsiortitsillutik energidrikkitortariaqarneq ajortunik energidrikkitortoqartarpoq. Matumanilu kikkut energidrikkitortariaqannginnersut ilisimaneqarluanngimmat ajornerpaavoq. Inuunermik pinnguarnermut assersuunneqarsinnaavoq, taama uummatit nakorsaat Peter Munkhammar, sveskit radioannut P4 Halland-imut oqarpoq.

Allatut oqaatigalugu, inuit energidrikkitortarnermikkut paasisimanngisaminnik inuunerminnik navianartorsiortitsisinnaapput.
- Assersuutigalugu kingornuttakkamik uummalluuteqaraanni, peruluttumik uummalluutip katsorsarneqarsinnaannginnera patsisaalluni imaassinnaavoq, energidrikkini akuutissat nappaatigineqartoq aallartitikkaa toqqutigineqarlunilu, Peter Munkhammer P4 Halland-imut oqarpoq, nangillunilu.
- Suliffigisanni napparsimaveqarfinni, inuusuttut toqqutigisaannik assersuutissarpassuaqarpoq.

Nalunaarusiami allassimavoq, eqeernartoq annertooq tulliuttunik kinguneqartitsisinnaasoq:

  • Toqqissiviinneq
  • Sinissaaleqineq
  • Uummammik kassuttoorneq

Aatsaat taamatut misissuisoqalinngilaq, assingusumillu misissuinerit ersersippaat, sapigaqalersarnermik, uippakajaalernermik, pinngitsuuisinnaajunnaarnermik, niaqorlunnermik, migræne-rnermik, isumatsassimangaarnermik, annilaanganermillu sunniuteqartartoq.