Ivigaaraasani arsaanneq pissarsiffiulluartoq

Finalimi SAK inersimasut 6-0-imik FC Asummiut ajugaaffigaat. (ass./foto: Johannes Ujo Müller)

 

Sisimiut Cup 2018 siullerpaamik ivigaaraasani unammisoqarnerani finalimi SAK inersimasut 6-0-imik FC Asummiut ajugaaffigaat.
Sapaatip akunnerata siuliani arfininngornermi unammisaqattaartitsineq aallartittoq holdit qulit pujleni marlunni averiarlutik arsaqattaartinneqarput.
Timersoqatigiiffiit ilisimariikkagut Sisimiormiut SAK aamma S68 ukioqatigiiaat assigiinngitsut peqataapput, taavalu Sarfannguarmiut Itillermiullu ataatsimoorlutik Sarfaq tunuliaqutaralugu arsaqataallutik. Taakkua saniatigut arsarluarsimaqisut normu 3-nngortut Sanasunngorniat kiisalu illoqarfitsinni timersoqatigiiffik nutaaq angusarissaarluni normu 2-nngortoq FC Asummiut nutaartaapput. Peqataapput S-68 Oldboys, S-68 U17 & U19, S-68 inersimasut, SAK U-17, SAK inersimasut, SAK oldboys hold 1 aamma hold 2, Sanasunngorniat, FC Asummiut kiisalu Sarfaq.
- Unammisaqattaarnermi immikkuullarissutigisinnaasaa tassaavoq holdit siornarniit sanilliullugu ikannerulaarlutik peqataammata. Taavalu ilinniartut ukiut kingulliit nalunaaraluariarlutik ilaanngittoortarnikuullutik, ukioq mannali taakkua Sanasunngorniat-nik taasut ilaammata, oqarpoq aaqqissueqataasoq Villy Olsvig.
Unammisaqattaarnermi unammisut inerneri ilai isertitserujussuarnernik kinguneqarput, ilaallu naligiilluartarsimallutik. Tamannalu nassuiaatissaqartinneqarpoq.
- Unammisut isertitai nikingasarsinnaanerisa peqqutigisinnaasai arlaqalaarsinnaagaluartut peqqutaanerpaaq tassaaneruvoq ilaanni holdit assersuutigiinnarlugu isikkaniliusussaagaluarlutik arfineq pingasuinnaariasaartoortarput, immaqa aavarfiup nalingeriaramiuk tamakkua aamma nipilersoqataasinnaagamik, Villy Olsvig nassuiaavoq.

 

Arsariaaseq allanngorpoq

Ivigaaraasanik arsaattarfik atuleqqammersoq malunnartumik arsartartut arsariaasiannut pitsaasumik allannguilluni sunniuteqarpoq. Nassuiaatigineqarpoq siullermik sioqqani sissuernerullutik arsartarsimapput, maannalu arsariaaseq pitsaasumik nuannernerusumik ingerlanneqarluni.
- Sisimiut Cup 2018 ataatsimut isigalugu ajunngilluinnartumik ingerlavoq, annillattaartut ataasiakkaannguit eqqaassanngikkaanni ajoquteqanngiivippoq, oqarpoq aaqqissueqataasoq S-68-imeersorlu Villy Olsvig.
Pokalit ingerlaartut marluk SAK inersimasut maanna paarilerpai, siorna SAK oldboys tigummisimallugit. Pokalinik siorna tunniussisuupput Qeqqata Kommunia aamma Brøndum.

 

Timersoqatigiiffiit suleqatigiiffigisinnaasaannik pilersitserusunneq

Sisimiuni timersoqatigiiffiit assigiinngitsut suleqatigiinnerulernissaat anguniarlugu suleqatigiiffiusinnaasumik union-imik, soorlu Nuummi Nuuk Boldspil Union (NBU) pilersinneqarsimasoq assigalugu pilersitsinissaq aaqqissuisut akunnerminni eqqartorsimavaat.
- Sisimiuni timersoqatigiiffiit ataatsimut suleqatigiiffigisinnaasaannik pilersitsinissaq aaqqissuisooqatikkalu akunnitsinni eqqartullatsiarsimavarput. Taamaalilllutik timersoqatigiiffiit tassunga ilanngukkunik aaqqissuussinissat annertuut tigusalissagaluarpai, imaanngitsoq timersoqatigiiffiit ataasiakkaarlutik noqquullutik. Taamatut aallartitsisinnaaneq ukiamut eqqartornerusussaassavarput, Villy Olsvig oqaluttuarpoq.
Sisimiut Cup 2018-imi aaqqissueqataapput Kristen Olsen Poulsen (SAK), Minik Hansen (FC Asummiut) aamma Villy Olsvig (S-68).

 

Inernerit:

  1. SAK inersimasut
  2. FC Asummiut
  3. Sanasunngorniat
  4. S-68 U17 & U19
  5. SAK Oldboys 1
  6. S-68 inersimasut
  7. Sarfaq
  8. SAK U17
  9. S-68 Oldboys
  10. SAK Oldboys 2

 

sisimiut cup 950px 02

Finalimi SAK inersimasut 6-0-imik FC Asummiut ajugaaffigaat. (ass./foto: Johannes Ujo Müller)

 

sisimiut cup 950px 03

Ivigaaraasani arsaattarfittaarneq arsariaatsimut pitsanngoriaateqartitsivoq. (ass./foto: Johannes Ujo Müller)

 

sisimiut cup 950px 04

Sila nilleraluaraangat aamma arsaattunik malinnaasoqartarpoq. (ass./foto: Johannes Ujo Müller)

 

sisimiut cup 950px 05

Villy Olsvig (S-68): - Ukiamut Sisimiuni timersoqatigiiffiit ataatsimut suleqatigiisitaliamik union-imik pilersitsisinnaaneq eqqartorneqassaaq. (ass./foto: Johannes Ujo Müller)

 

sisimiut cup 950px 06

Pokalit ingerlaartut marluk SAK inersimasut maanna paarilerpai, siorna SAK oldboys tigummisimallugit. (ass./foto: Johannes Ujo Müller)

 

sisimiut cup 950px 07

(ass./foto: Johannes Ujo Müller)

 

sisimiut cup 950px 08

(ass./foto: Johannes Ujo Müller)