Utoqqaat Sisimiuni unammiuaarnerat

Arnani Eqartoq hockey-mi (floorball) kingumut pissartanngoqqippoq.  (ass./foto: William Berthelsen)

 

Sapaatip akunnerata siuliani Kalaallit Nunaanni Utoqqaat Suliunnaarnersiutillillu Timersoqatigiiffiisa Unammiuaarneranni utoqqaat sinerissameersut Sisimiunut unammersuariarlutik tikeraarput. Aatsaallu taamak utoqqaat amerlatigisut peqataapput.

Unammiuaarneq Sisimiuni Utoqqaat suliunnaarnersiutillillu timersoqatigiiffiat Eqartoq-mit aaqqissuunneqartumi utoqqaat katillugik 190-it missaanniittut peqataapput.
Ataasinngornermi 23. juli nal. 13:30 ammaanersiorneq timersortarfimmi aallartippoq, pingasunngornerullu tungaanut unammisaqattaarutinik assigiinngitsunik unammiuaarlutik. Unammissutaapput isikkamik assammillu arsaanneq kiisalu hockey (floorball).

- Peqataasut nuannisaqalutik peqataapput, aamma Eqartukkormiut assut nersualaartipput aaqqissuilluarsimanerat pillugu. Nuanneq, nuannersorujussuuvoq taamatut nersualaarneqarluni. Aamma avataaniit tikittutta qiimaqalutik katerisimaarnerput nuannersunngortikkamikku. Ataqatigiilluinnarluta ingerlagatta nuannersorujussuuvoq, oqarpoq Eqartumi siulittaasoq Johanne Jonathansen.

 

Pikkorissarneq ataatsimeersuarnerlu

Sisamanngornermi tallimanngornermilu ikiueqqaarnermut, peqatigiiffilerinermut tunngasut, sungiusaasutullu sungiusartinneqarput. Sisamanngornermi KNUSTAS – Kalaallit Nunaanni Utoqqaat Suliunnaarnersiutillillu Timersortartut Ataatsimut Suleqatigiiffiat ataatsimeersuarpoq, siulittaasunngorporlu Bendt Søholm, Oqilaatsoq Aasiaat.
Tallimanngornermi minihallemi arnat assammik arsarnerat naammassineqarpoq unnukkullu Timersortarfimmi nereqatigiittoqarpoq pokalinik ujamminillu agguaasoqarluni.

- Nuannersorujussuarmik naapisimaartaratta utoqqaat kajumissaaginnassavagut Eqartumut ilaasortanngoqqullugit. Utoqqarpassuit maaniittut qiimaqalutik timersorlutillu ingerlatsineranni meeqqanut inuusuttunullu maligassiuipput. Utoqqanngoraluarlunimi qiimalluni nuannaarlunilu qanoq timersorneq ingerlanneqarsinnaanera takutimmassuk. Isumaqarpunga maligassiuilluartugut utoqqaasugut inuusunnerusunut meqqanullu, oqarpoq Johanne Jonathansen.
Eqartumi siulittaasup neriuutigaa peqataasartut amerliartortut suli siunissami amerliartorumaartut.

 

Arnat pissartanngoqqipput

Eqartukkut arnartaat hockey-mi siorna pissartaanertik illersorlugu kingumut pissartanngoqqipput. Finalimi ”Oqilaatsoq” Aasiammiut ajorsartippaat.
Upernavimmiit kujammut Qaqortumut peqataasoqarpoq, Atammimmeersullu nunaqarfimmiortaralugit. Peqataanngitsut tassaapput Qaanaaq, Uummannaq Nanortalik Tunumiullu. Taamatut aaqqissuussisarneq ukioq allortarlugu aaqqissuunneqartarpoq.
Tulliani sumi illoqarfimmi aaqqissuunneqassanersoq siulersuisuusut kingusinnerusukkut aaliangissavaat.
Avannaamiut arfininngornerup unnukkuani sinersortaammik aallarput, kujataamiullu ataasinngornerup ullaavani angerlarfissaminnut aallarlutik.

 

Inernerit:

Arnat isikkamik arsaannerat
1. Minngaatsoq, Qeqertarsuaq
2. Pequi, Qasigiannguit
3. Eqartoq, Sisimiut

Angutit isikkamik arsaannerat
1. Oqilaatsoq, Aasiaat
2. Qiimmaallugu, Paamiut
3. Pequi, Qasigiannguit

Arnani hockey (floorball)
1. Eqartoq, Sisimiut
2. Oqilaatsoq, Aasiaat
3. Qaqqaaraliat, Qaqortoq

Angutini hockey (floorball)
1. Pequi, Qasigiannguit
2. Eqartoq, Sisimiut
3. Oqilaatsoq, Aasiaat

Arnani assammik arsarneq
1. Minngaatsoq, Qeqertarsuaq
2. Qaqqaaraliat, Qaqortoq
3. Qiimmaallugu, Paamiut

Angutini assammik arsarneq
1. Pequi, Qasigiannguit
2. Uaasoq, Ilulissat
3. Oqilaatsoq, Aasiaat

 

Utoqqaat Sisimiuniittut 950px 02

Tallimanngormat Sisimiut Timersortarfiani nereqatigiinnermik ujamminillu agguaanermik naggaserneqarpoq. (ass./foto: William Berthelsen)

 

Utoqqaat Sisimiuniittut 950px 03

Eqartukkormiut pokalertik kivippaat. Kivitsisuuvoq peqataasoq sungiusaasuusartorlu Amalie Berthelsen. (ass./foto: William Berthelsen)