Looqi Nuummi tilluutilerpoq

Sungiusaasoq Otto Akku Kielsenip sungiusakkani Looqi Andreassen siunissami neriunaateqarluartuusoq oqaatigaa. (ass./foto: Johannes Ujo Müller)

 

Sisimiormioq tilluuttartoq 23-nik ukiulik Looqi Andreassen arfininngorpat marsip 17-iani Icelandermioq Garpur Fletcher Nuummi unammissavaa.
Tilluuttussat oqimaannerpaat tulliini sværvægt 81-91 kiilumi oqimaassuseqartuni unammissapput.
Looqi Andreassen Sisimiuni tilluuttartuni 2016-imi aallartippoq, taamanikkut tilluunnermik sungiusaasoq Otto Akku Kielsen Sisimiuni tilluuttarneq unittoorsimasoq aallarteqqinniarlugu sungiusaalernerata kingorna.
Kingullermik 2016-imi novembarip sisamaanni Looqi Andreassen Sisimiut timersortarfiani nuummioq unammivaa, ajugaaffigalugulu.
- Tassani Sisimiut oqaluttuarisaanerani qallunaat nunaanni maleruagassat malillugit unamminermi siullersaalluni Sisimiuni ajugaavoq, sungiusaasoq Otto Akku Kielsen oqaluttuarpoq.
Sisimiuni tilluuttartut sungiusaasuata Otto Akku Kielsenip naatsorsuutigaa Looqi tilluunnermut ineriartorluarnera soqutiginnittuuneralu pillugu siunissamut neriunaateqarluartuusoq.
Looqip unammisassani Garpur Fletcher ilisarisimanngilaa sungiusartarneranik angusaqartarneranillu ilisimasaqarfiginagu.

 

Ajugaarusunneq

- Unamminermi misigissutsit atornaveersaarnissai pingaartippara. Soorunami ajugaanissaq anguniarsarissavara, Looqi Andreassen oqarpoq.
Looqi Andreassen Sisimiut illoqarfiani angeqqatiminik sungiusaqartissaaleqisarpoq, angeqqatigisamimmi sungiusaqatissaqaraanni ineriartornarnerusarmat.
- Unammisassaa Islandimi angeqqatiminik sungiusaqatissaaleqisarsimanavianngilaq, tamannali naammagalugu aporfiginagulu Nuummi akiuussaagut, sungiusaasoq Otto Akku Kielsen oqarpoq.
Sisimiuni tilluuttartoqarneq piumassuseq malillugu ingerlasuuvoq, ingerlanneqarniarneralu piffissartornartuummat piffissap ilaanni uninngasinnaasarluni.
- Nuannaarutigisinnaavara Sisimiuni timersuut tilluuttartoqarneq malunnartumik tapersersorneqaleriartortoq maluginiarakku, sungiusaasoq nassuiaavoq.
Nuummi tilluuttartut BK Nanoq unammisitsinermi aaqqissuisuussapput.

Sisimiormioq Looqi Andreassen arfininngorpat Islandermioq Garpur Fletcher unammissavaa. (ass./foto: Johannes Ujo Müller)