Sisimiormiut sisorallammaat pingasut AWG-mut toqqagaapput

(ass./foto: Ólafur Rafnar Ólafsson)

 

Ukioq manna Arctic Winter Games Canadami ingerlanneqartussamut kalaallit sisamat ujakkaartartut toqqagaapput, pingasut Sisimiuneersut ataaserlu Nuummeersoq.
Kalaallit Nunaanni Sisorartartut Kattuffiata Nunarput sinnerlugu peqataasussat sisamat toqqaqqammerpai, taamatut nalunaaruteqarpoq Nunanut allanut unammisartut sungiusaasuat Øystein Slettemark.

Toqqagaasut tassaapput Bjarne Herbert Hansen (SSP), Anne Mette Noahsen (SSP), Naala Rasmussen (SSP) kiisalu Nukarleq Jeremiassen (NSP).
Sisimiormoq Bjarne Herbert Hansen ilinniarnini peqqutigalugu Nuummut nuussimasoq ujaminnannissaminut isumalluarpoq.
- Misigisimavunga sungiusarluarsimallunga. Siornali aasakkut sungiusarnera ingerlalluavataarpoq, juullillu kingorna aamma ajorani, oqarpoq Bjarne Herbert Hansen.

Kingullermik Nuummi Arctic Winter Games-ertoqarnerani Bjarne Herbert Hansen ujakkaarluni sukuutsernermi 750 miiterimut kuultinnappoq.

- Unammisareernerup kingorna piareersimavunga. Kingullermik Arctic Winter Games-ertoqarmat kuulti pissarsiareereernerup kingorna misigisimavunga pissarsiarinissaa ajornarnavianngitsoq. Takisuunut unamminernut siulliunissara ilimagivalaanngilara, kisianni sprintinut ilimasunneruvunga, Bjarne H. Hansen isumalluaqisoq Sillermut oqaluttuarpoq.

Anne Mette Noahsen Nukarleq Jeremiassen Nuummi AWG-mut aamma peqataanikuupput.
Kalaallit Nunaat ujamminik 81-inik pissarsivoq, tassanilu 39-it kuultiullutik.
Ukioq manna AWG Canadami South Slave-mi marsip 18-ianiit 24-at ilanngullugu ingerlanneqassaaq.

 

Sisimiormiut niviarsissat ujakkaartartut Anne Mette Noahsen aamma Naala Rasmussen marsip 18-ani Arctic Winter Gamesimut peqataassapput. (ass./foto: privat/Anne Mette Noahsen)