Suliassaq qitiutillugu ilisimasallu tunngavigalugit Inatsisartuni sulisoqassaaq

Inatsisartunut qinigassanngortittoq Markus E. Olsen, Siumut Sisimiut


Maannamut Inatsisartut sulineranni suliassat annertuut pineqartillugit aningaasatigut qanoq kinguneqarsinnaanerat sukumiisumik nalilersorsimatinnagu suliakkiinerit unitsinneqarsinnaasariaqarput. Illuatungaanili nunatta sutigut tamatigut aningaasarsiornikkut imminut napatilernissaanut periarfissarsiorneq annertusartariarpoq, nuiernikkut tunisassiornikkullu. Taassuma saniatigut inuiattut naleqartitavut aallavigalugit ilaqutariittut inuiaqatigiittullu nakusassaqatigiinneq pisariaqartipparput, inuit tamatta immitsinnut atorfissaqartikkatta. Taamaammat peqqinnissaqarfiup iluani nakorsaariaatsinik katsorsaariaatsinillu nutaanik aqqutissiuussinissaq pisariaqarpoq, tamannalu Peqqissaanermik ilinniarfik aqqutigalugu pilersinneqarsinnaavoq.

Inuiaqatigiit nunaqqatigiillu qanoq ittut pilersinniarpavut?
Oqaluttuarisaanermik ilisimasat misilittakkallu aallaavigalugit apeqqutit eqqortut akissutissarsiorlugit malersorsinnaagaanni siunissami suliassat pingaarnersiorneqarsinnaapput. Taamaammat pisariaqarpoq Inatsisartuni sinaakkutit pitsaasut ilusilersornissaat siunissarput naleqartitavut aallavigalugit inerisarneqassappat.

Sinerissami nunaqqatimalu akornganni saqqummiisarninni maluginiartarpara ilisimasatigut avitseqatigiinneq siammarterinerlu pisariaqartinneqartoq. Suliassallu assigiinngitsut pineqartillugit susassaqarfiit akornganni ataqatigiissaakkamik ingerlatsineq pisariaqartinneqarpoq. Soorlu suliassaq sunaluunniit assigiinngitsunik kalluagassaqarpat kalluagassai aamma malinnaatinneqartariaqarmata, mittarfissualiornermiippat aalisartagassiissutilluuniit pineqarpata.

Nunarput nunarsuarmioqatigiinnerup aqqani immikkuullarissumik inissisimavoq, taamaammat naalakkersuinikkut aqutseriaatsikkullu paasinnittaatsinik nutaanik aqqutissiuussinissaq aamma pisariaqarpoq, soorlu siulersueriaatsip aqutseriaatsillu tungaatigut sutigut tamatigut imminut napatilernissamut aaqqissuusseqqinnissaq siunertaralugu.

Siulivut ajoqersuineq "nutaaq" aallavigalugu isumataartinniarneqarsimapput, taamaattoq piffissanngorpoq ileqqut tamakkua aamma nutarteqqinnissaat, soorlu Ilagiinni sullisseriaatsip naleqqussarnissaa susassaqarfiit akimorlugit suleqatigiinnissaq aqqutissiuukkumallugu.

Qinersinissamut allanngueqataarusukkuit pissaaneq ilinniippoq, periarfissaqarputit illit nammineq pingaartitannut soqutigisannullu qaninnerpaamik Inatsisartuni qinigaatitaqassallutit; taamaliorsinnaavutillu nunaqqativit akornganniitumik Inatsisartuni suliassaq ilisimasaqassasuserlu pingaarnerutillugit suliaqarusuttumik toqqaanikkut. Taakkua akornganniippunga.