Meeqqerivinni inuleriffinnilu allani assaat kissartut pisariaqartippagut

Arnat ulluannut atatillugu ukiut tamarluinnaasa nalunaarutigineqartarpoq arnat angutillu akissarsiaat
suliffimminnilu atugassaat nikingasorujussuusut.
Tassanilu aallaaviit pingaarnersaraat arnartagut inuleriffinni, soorlu meeqqerivinni utoqqarnut, innarluutilinnullu sullissivinni atorfeqartut tamangajammik arnaammata.

Pisortat tungaaniit tamanna eqqumaffiginerusariaqarparput. Meerartatta pisariaqartippaat meeqqerisortik meeqqivinniinnertik tamaat sullissisorissallugu.

Oqaluuseriuaannarparput meerartagut tassaasut nunatta siunissai, aap tamanna ilumoorpoq.
Paasisariaqarparpulli angajoqqaat sinnerlugit, soorlu meeqqerivinni sulisut ullormut 8-10 tiimit meerartatsinnut sullissisarmata.

Ullutsinni meeqqerivinni sulisussanik amigaateqartuaannarpugut. Meeqqerivinni sulineq tamaviaarnartuuvoq qasunartarsinnaallunilu. Tamanna nassuerutigisigu atugassarititagullu nutarterlugit. Aatsaat taamaliorutta meeqqerivinni sulineq kajuminnartunngortissavarput sulisullu aalajaatsut meerartagut siunissami inuiaqatigiinni toqqissisimasumik inooqataanissaannut angajoqqaanut annertuupilorujussuarmik tapertaalissagaluarput.

Meerartatsinnik sullissisut sulinerat sivikillisigu akissarsiaallu qaffarlugit, pikkorissarnissamut sulinngiffeqarnissamullu periarfissaat annertusarlugit. Taamaaliorutta meeqqerivinni sulisussaqarniarneq ajornannginnerulissaaq. Ukiunilu arlalinni taakkunani sulinissaminnut kajuminnerulissapput.
Uani aamma taamatut pineqassapput innarluutilinnik utoqqarnillu sullissisugut.

Taamaaliornissatsinnut akissaqartariaqarpugut. Meeqqanut tunngasut meeqqeriviit aqqutigalugit iluarsigutsigit pinngitsoorani ajornartorsiuterpassuit massakkut nalaattakkagut siunissami ikinnerulissapput.

Meerartagut nunattalu siunissaa pillugit taamaaliornissatsinnut pinngitsoorata akissaqarpugut.
Siunissaq tamatsinnut toqqissisimanarnerusoq angussavarput.

Anguniakkat qulaani taasakka Inatsisartutigoortumik suliarineqalerpata arnat angutillu akissarsiaasa assigiinnerulernissaat anguneqassaaq. Arnat suliffiginerusaanni atugassarititat pitsaanerulerpata isumaqarpunga aamma inuiaqatigiit naligiinnerusut toqqissisimanerusullu anguneqassasut.

Sumiikkaluaruttaluunniit assaat kissartut pisariaqartippagut.
Sapinngilagut !