Timmisartuussileqatigiiffimmik tamakkiisumik kalaallinit peqalernissaq piffissanngunnginnerluni?

Ulluni kingullerni tusagassiutitigut IA-miit saqqummiunneqartoq tunngaviatigut isumaqatigeqaara. Aammalu nuannaarutigeqaara IA allatut isumaqalersimalluni ulluni kingullerni angalatitseqatigiiffiup Air Greenland-ip tamakkiisumik inuiaqatigiinniit pigineqalersinnaanissaa saqqummiummagu. Tassami SAS-p piginneqatiginnissutini Namminersorlutik Oqartussanut 2012-imi tunerusukkaluarmagit IA-p siuttuunerani itigartitsissutigineqarsimasoq uani atuarneqarsinnaammat:

https://www.check-in.dk/sas-kan-ikke-komme-ud-af-air-greenland-7/

Piginneqatiginnissutilli pisiarineqassappata imaluunniit allatigut aaqqiisoqarnissaanik ujartuinissaq aamma inuiaqatigiinnut aningaasatigut qanoq kinguneqarsinnaanera qulaajarluarnissaa peqataaffigissavara.

Piffissamimi sivitsortumi innuttaasut amerlasoorpassuit, minnerunngitsumillu illoqarfinni minnerusuni nunaqarfippassuarnilu angallanniarnikkut kiffartuunneqarnerit pitsaanngilluinnarput.
Naalakkersuisutut akisussaaffigilersimasannut tamatumap piaartumik aaqqiiviginiarnera ilungersunartaqaaq, angalatitseqatigiiffiit isumaqatigiissusiorfigineqarsimasut ukiunut arlalinnut pituttorlugit isumaqatigiissusiorfigineqarsimammata aningaasarpassuit atorlugit atorunnaarsinnianngikkaanni. Taamaattumik piffissaq annertooq atorsimavara, siunissami taamak inissittoqannginnissaa anguniarlugu akisussaaffimmik tigusillunga aaqqiissutissanik suliaqarnissaq.

Ajornartorsiutilli qitia tassaavoq isumaqatigiissuteqarfigineqarsimasut ilaat, soorlu silaannakkut angallassinissaminut nammineq qulimiguulinnik pigisaqanngitsunut isumaqatigiissusiorfigineqarsimammat, taamaattumillu Air Greenland attartorfigisariaqalersimalluni. Naluneqanngitsutuullu Air Greenland ukiorpassuarni qulimiguulinnik nutarterisimanngilaq.
Tamatumap kingunerisaanik qulimiguullit soorlu teknik-imik peqquteqartumik taamaatiinnarneqartarnerat ulluinnarsiutinngortinneqarsimanera politik-ikkut akuersaaginnarneqarsinnaanngilluinnarpoq. Innuttaasummi kiffartuunneqarnerat pitsaanerulersinniarlugu toqqissisimanartuunissaanillu tamarluinnatta angorusutaqarpugut. Tamannali malunnaatilimmik timitalersorneqassappat atortut ullutsinnut naleqqunnerusut pigilernissaat anguneqapallattariaqartoq isumaqarpunga.

Air Greenland-imik piginneqatiginnissutit qallunaat naalagaaffianit Namminersorlutik Oqartussanit aammalu SAS-miit pigineqarput. Taamatullu aggulussimanerat Kalaallit Nunaanni angallannikkut ineriartortitsiniaanermut pitsaasuunngilaq, isumaqarpungalu ineriartornissamut noqitsisut politik-ikkut aaqqiivigineqartariaqalersoq, ineriartornissamullu aquut tamakkiisumik kalaalliniit tiguneqartariaqalerpoq. Akuersaaginnarneqarsinnaanngilarmi innuttaasut atuisut akiligaannik avatitsinniittut kiisalu aningaasanut inatsit aqqutigalugu (soorlu kiffartuussinermik isumaqatigiissutit aqqutigalugit) aammalu piginnittut iluanaarutaanniit agguargarsinissartik pingaartinnerutilersimappassuk, nunatsinni ineriartornissamut pitsanngorsaanernullu aningaasaliinissaq piunnaarlugu.

Taamaattumik kiffartuussinissamik isumaqatigiissutinik suliaqarnissamik kivitsisussat ilumut suliami naammassisinnaassuseqarnerat apeqqusissallugu inissaminiilluinnarpoq, nalilersorneqartariaqarporlu. Akisussaaffimmik qimarratiginninniaaneq peqataaffigissanngilara, kisiannili akisussaaffimmik tigusilluni aaqqiiniarneq peqataaffigerusuppara, inuiaqatigiit kalaallit pillugit sulisussaagatta.

Innuttaasut pillugit sullissineq pitsaajunnaarsimasoq isiginngitsuusaaginnarnagu SAS aammalu qallunaat naalagaafiata Air Greenland-imik piginneqatiginnissutaat piaarnerpaamik pisiarineqartariaqarput, nutaamik angalatitseqatigiiffimmik kalaallinut uummatilimmik pilersitsinianngikkutta. Taamaasiornikkullu kiffartuunneqarneq aatsaat pitsaanerulersinnaasorigakku.

Inussiarnersumik inuulluaqqusillunga
Erik Jensen, SIUMUT tunuliaqutaralugu Inatsisartunut qinigassanngortittoq