Kangerlussuup Aasivissuillu akornanni aqqusinermut 22 mio. koruunit akuersissutigineqarput

(ass./foto: Qeqqata Kommunia)

 

All. Qeqqata Kommunia

Taanna okt. 25-ani Kommunalbestyrelsip ataatsimiinnerani aalajangiunneqartut ilagivaat.

Kommunalbestyrelsip ataatsimiinnera annertunerusumik qaammatinik pingasukkaarinerup pingajuanut aningaasaqarnikkut nalunaarusiamik imaqarpoq.

Kangerlussuup Aasivissuillu akornanni aqqusinermut 22 mio. koruunit immikkoortinneqassasut isumaqatigiissutaavoq. UNESCO-p nunarsuarmioqatigiinnut kingornussassanut allattorsimaffianut ilanngunneqarnikut nunarsuarmioqatigut kulturikkut immikkuullarissunik peqarnitsinnik oqaluttuussinnaanngornikuuvagut. Ilanngutitsinneqarnerpullu aningaasarsiornikkut iluaqutigissagutsigu tikikkuminarsartariaqarparput, soorluli nunani allani Islandimilu takusarigut pinngortitap aningaasarsioruutiginissaanut aqquserngit qanoq pingaaruteqartigineri, Aasivissuarnullu aqqqusineq tassaassaaq Kangerlussuarmiit Sisimiunut aqqusinissap aallarniutissaa.

Utoqqarnut inissiat innarluutilinnullut init anginerusut

Ukiup tullianut missingersuutit aappassaaneerneqarneranni ilaatigut aalajangiunneqarpoq, eqqaavilerinermut/anartarfilerinermut akiliutaasartut siunissami ukiut tamaasa 10 procentimik qaffanneqartassanngitsut, aalisartunut piniartunullu atugassarititaasunik pitsanngorsanissamut 4 mio. koruunit, 2020-mi 3 mio. koruunit immikkoortinneqassasut, Minngortuunnguup atuarfiani innarluutilinnut atuartitsiviit inikipallaarneri pissutigalugit allamut nuunneqarnissaanut pilersaarusiornissamut 200.000 krouunit immikkoortinneqasssut, kiisalu Sisimiuni utoqqarnut inissianik aqqaneq-marlunnik sanaartortoqassasoq, inissianut taakkununnga utaqqisut amerlammata.

2018-imi septembarip 20-ani Qeqqata Kommunianut akiitsorineqratut juunip naaneranut sanilliullugit 9,5 mio. koruuninik appariaateqarput, tamanna akileraarutitigut utertoorutissat tunniunneqannginnerini akiitsullit ilanngaavigineqarnerannik patsiseqarpoq. Illuatungaatigulli meeqqanut akilersuutit (a-bidrag) maanna 60,7 mio. koruunit akiitsorineqarput, tammanalu ukiup kingulliup taamaalineranut 3 mio. koruuninik qaffariarneruvoq.

Qulaani taaneqartut saniatigut kuuffissualiortiternerit (kloak) sukkanerusumik ingerlanissaat anguniarlugu aningaasaliissutit marloriaatinngortinneqarput aammalu sanaartorfissanut nutaanut nunagissaanerit annertunerusumik ingerlanneqarnissaat anguniarlugu aningaasaliissutit qaffanneqarlutik.