Kangerlussuaq qulimiguulinnuinnaq mittarfinngoqqunngilaat

Kangerlussuaq qulimiguulinnuinnaq mittarfinngornissaa akerleralugu ataatsimoorlutik suliniuteqartut oqariartuuteqarput. (ass./foto: Arctic Circle Business)

 

Demokraatineersoq Niels Thomsenip Kangerlussuup Narsarsuullu qulimiguulinnut mittarfinngortinneqarnissaannut siunnersuuteqareersorlu Sisimiuni politikerit Arctic Circle Business-imeersullu ataatsimoorlutik akerliullutik qisuariaateqarput.
Arctic Circle Business-imeersut, Sisimiunilu partiit immikkooortortaqarfiineersut, Siumut, Atassut, Inuit Ataqatigiit, Demokraatit, Partii Naleqqamiillu Kangerlussuup mittarfissuartut atuutiinnarnissaa kissaatigalugu Kangerlussuullu ineriartortinnissaa tapersersorusullugu ataatsimoorlutik oqaaseqaateqarput.
- Kangerlussuup mittarfissuartut atuutiinnarneratigut nuna tamakkerlugu takornariaqarnikkut ineriartorneq qulakkeersinnaavarput. Oqariartuutigaarput Qeqqata Kommunia nunatsinni takornariaqarfiit annerpaat aappaatut pingaartinneqassasoq isiginiarneqarlunilu, partiit aamma ACB taama allagaqaasiorput.
Qulimiguulinnuinnaq mittarfinngussappat takornariaqarnerup annertusiartorluni ineriartorfiugaluartoq innarlerneqassaaq. Suliat pilersaarutillu annertuut ingerlapput, soorlu Sisimiut Kangerlussuullu akornanni aqqusiniliornissaq pingaartinneqaqisoq piviusunngortinnissaanullu isumalluarfigineqaqisoq kiisalu Kangerlussuarmi talittarfiliornissaq pingaartinneqarput.
- Taamaattumillu Naalakkersuisut siuliisa kiisalu Qeqqata Kommunia isumaqatigiissutaat malillugu sulineq ingerlateqqissagaat kaammattorusuppagut. Taamanikkut angallannermut Naalakkersuisuusoq Erik Jensen kiisalu borgmesteri Malik Berthelsen isumaqatigiissuteqarnikuummata, suliniuteqartut allapput.

 

Takornariarfik immikkuullarissoq

Aasap ingerlanerani nuna annertooq UNESCO-mit akuerineqarsimasoq atorluarneqassasoq aamma takornariaqarnikkut iluaqutaasussaasoq qularutigineqanngilaq. Nunatsinni kisiartaalluni sermersuarmut ingerlasoqarsinnaavoq, attorneqarluni aqqutigineqarlunilu.
- Tamatuma saniatigut nunataq annertuunik periarfissiisoq ilisimavarput ilisimatusarnikkut suliat kiisalu inuussutissarsiornikkut aalisarnikkut, nunalerinikkut piniarnikkut aalisarnikkullu ineriartorfissaqarluartoq. Taamaattumik nungusaanata ineriartortitsinissamik oqariartuuteqarpugut. Maannami siunnersuutigineqartut Qeqqata Kommuaniata aatsitassarsiornikkut periarfissat eqqarsaatigalugit killiliisuussapput.

Nunatsinni angallannermi timmisartut missinnaassusaat malunnaatilimmik ajorseriarnissaat amerlasuullu sivisunerusumik angalasalernissaat aarleqqutigaat. Taamatuttaaq inuutissarsiuteqartut nioqqutissanik tikisitsiniarnerminni nassiussiniarnerminnilu attaveqatigiinnermik ingerlalluartumik pisariaqartitsinertik pingaartippaat.

Ataatsimoorlutik suliniuteqartut kissaatigaat Inatsisartut Naalakkersuisullu taakkartorneqartut eqqumaffiginissaat, Qeqqata Kommunianilu kommunalbestyrelsip Kangerlussuup mittarfissuartut ataannarnissaanut suliniarnera tapersersorlugu.

 

Kangerlussuaq 950px 02

Takornariaq Finland-ermioq 80-inik ukiulik 70-ikkunnili Kangerlussuakkoorluni takornariartuaannartoq ukioq manna Kangerlussuarmeeqqittoq tikiffini nuannarisaqaa. (ass./foto: Johannes Ujo Müller)

 

Kangerlussuaq 950px 03

Kangerlussuaq takornarissanut immikkuullarilluinnartoq ineriartortittuarnissaa tikikkuminartuunissaalu kissaatigineqarpoq. (ass./foto: Johannes Ujo Müller)