Henrik Fleischer Siumut partiianut nuuppoq

(ass./foto: Johannes Ujo Müller)

 

Henrik Fleischer Partii Naleraq tunuliaqutaralugu qineqqusaarluni takuneqartarlunilu tusarsaasoq maanna Siumut tunuliaqutaralugu takussaalissaaq.
Inatsisartunut qinersereernerup kinguninngua ullup sisamat qaangiutiinnartut Henrik Fleischer Partii Naleraq qimanniarlugu aaliangerpoq. Ullualuit qaangiummata Siumut Partiimut nuuppoq.

- Uanga misigisimagama politikkikkut suleqqinnissanni ingerlariaqqittariaqarlunga Partii Naleqqami ilaasortaajunnaarpunga, oqarpoq Henrik Fleischer.
Partii Naleqqap siulittaasuata Hans Enoksenip tusaramiuk Henrik Fleischer Siumumut nuunniarluni aaliangertoq nuannerpallaanngitsumik misigisimavoq.

- Ikinnguterput Aalisarnermut ataatsimiititaliamut siulittaasunngornissaanik piumaffigigaluarparput, aamma ataatsimiititalianut allanut neqeroorfigineqarpoq piumannginnami, Hans Enoksen facebook aqqutigalugu oqallittuni allappoq.

Tunuarnera pillugu oqallittuni inuit tupigusuttut paasinnillutillu qisuariartut arlaqarput.
- Soorunami inuiaqatigiinnut kusananngikkaluarpoq. Kisianni oqaluttuarisaanermi uangaannaanngilaq, taama iliornikoq. Aamma inatsisinik unioqqutitaqanngilanga, Henrik Fleischer KNR-imit apersorneqarami taama oqarpoq.

 

Arriitsumik aaliangeriartuaarsimavoq

Sooq Siumut sinnerlugu qineqqusaaginnarsimannginnersoq KNR-imit aperineqarami Henrik Fleischer ima akivoq.
- Pisut piartuaarnerini aalajangeriartuaarnera arriitsumik ingerlarusaarsimavoq. Uggornaraluartumillu piffissaa nuanninnginnerpaaffianiikkaluarluni taama aalajangertariaqalerneq allatut ajornarsimavoq, Henrik Fleischer oqarpoq.

Qinersinermi Henrik Fleischer 143-nik taaneqarsimavoq, Hans Enoksenilu 2.500-nik amerlanerulaartunik taaneqarnerata pissutaanik Inatsisartunut ilaasortanngorsimalluni.

Partii Naleqqap Inatsisartunut ilaasortaatitai sisamaasimasut maanna pingasunngorput. Siumut ilaasortaatitai qulingiluaasimasut maanna qulinngorput.