Kangerlussuaq artorussiuk, qaassiuk!

Kangerlussuup iluarsaanneqarnissaanut Deloittep naatsorsugaa 700 mill. kr. imaluunniit DTU-mi ilisimatusartut naatsorsugaat 100 mill.kr. sorleq uppernarnerua? (Johannes Ujo Müller)

 

Toqqaannartumik qulequtaa malillugu Qeqqata Kommuniani borgmesterip oqaatiginngikkaluaraa, akisussaaffilli qunuginagu tigorusullugulu tusagassiorfikkut oqariartuuteqarpoq.

Ukioq manna assigiinngitsuni ataatsimiinnerpassuit Kangerlussuarmut tunngassutillit Qeqqata Kommuniani Namminersorlutillu Oqartussani amerlaniannguatsiaqaat.
Siullermik Naalakkersuisup siulittaasuata Kim Kielsenip tusagassiorfitsigut uppernarsarpaa ilumut Kangerlussuaq matuneqassanngitsoq. Taamaattorli ineriartornera ajorseriartornissaa innuttaasunit Qeqqatalu Kommuniani qinikkanit ernumanartoqartinneqarpoq.

Kangerlussuup siunissaa pillugu ataatsimiinnissaq pingaarutilik qaninnerpaaq 24. maj Kangaamiuni Qeqqata Kommuniani kommunalbestyrelsip eqqartussavaa. Piginneqatigiissumik pilersitsisoqassanersoq qanorlu naleqarumaassanersoq ataatsimeereernerup kingorna paasinarsiumaarpoq.
Borgmesteri Malik Berthelsenip Qeqqata Kommuniata suliffeqarfiillu namminersortut suleqatigalugit Kangerlussuarmi mittarfik akisussaaffigilerlugu tigunissaanut Naalakkersuisut oqariartorfigai.

 

Paasissutissat amigartut

Kangerlussuup iluarsaanneqarnissaa 700 million koruuninik naleqassangatinneqarpoq. Illua-tungaani ilisimatusartut DTU-mi Center for Arktisk Teknologimit misissorneqareerluni 100 million koruuninik naleqassangatinneqarpoq. Ilisimatusartut tupigusuutigaat Namminersorlutik Oqartussat naatsorsuititsineranni paasissutissat pingaarutillit assigiinngitsut ilanngunneqartarsimannginneri. Soorlu ilaatigut silap qanoq innera, silaannaap ineriartornera, avataaniit isertitsissutaasinnaasut sipaarutaasinnaasullu ilaatigut illersornissaqarfiup aningaasartuutigisinnaasai erseqqissumik ilanngunneqarsimanngimmata.

Assartuussinermut Isumalioqatigiissitap 2011-meersumi allaqqasut aamma ilagaat timmisartuussineq Kangerlussuarmiit Nuummut nuunneqarpat tamanna timmisartut tikittarnersisa akulikissusaata 100 procentingajammiit 94 procentimut apparneranik kinguneqassasoq. Tassa imaappoq Nuuk silarlunnerata pissutaanik sapaatit akunnerit pingasut missaanni miffigineqarsinnaassanngitsoq. Paasissutissat eqqortut tamakkua Deloittep nalilersuineranut ilanngunneqarsimanngitsut Aalborg Universitetiani professorip Ulrik Jørgensenimit tupigusuutigineqarluni oqaatigineqarpoq.

Naalakkersuisut siulittaasuata Kim Kielsenip neriorsuutigaattaaq Kangerlussuup ingerlanneqarnerani amigartoorutaasut iluatsinnissaata tungaanut Namminersorlutik Oqartussanit matussuserneqartarumaartut.

 

Kangerlussuaq artorussiuk 950px 02

Piginneqatigiiffiliornikkut kommunip suliffeqarfiillu namminersortut suleqatigiillutik Kangerlussuup ingerlanneqarnera tigorusunneqartoq takornariaqarnikkut iluaqutaalluarsinnaasorineqarpoq. (Johannes Ujo Müller)