Sisimiormiut qinigaasut Inatsisartuni sukataarniarput

Sisimiormiut Inatsisartunut qinigaasut sulinissaminnut sukataarniarput. (ass./foto: Johannes Ujo Müller)

 

Sisimiormiut politikerit qinigaalluartartut marluk Inatsisartunut qinersisoqarnerani qinigaasut Inatsisartuniilerunik sukataarumapput.
Sisimiormiuni qinigaalluarnerpaat tassaapput Siumut partiianeersut ukiorpassuarni Sisimiut Kommunerisimasaani Qeqqatalu Kommuniani borgmesteriusimasoq, 429-nik qinerneqartoq, Hermann Berthelsen aamma Naalakkersuisuusimasoq, 424-nik qinerneqartoq, Erik Jensen. Sisimiuniit qinigaaqataavoq, 143-nik qinerneqartoq, Partii Naleqqameersoq Henrik Fleischer.

 

Sukasaat

Qineqqusaarnermi maluginiagassaavoq Sisimiuni partiini tamani Sisimiormiunit isertitaqarnissaq qinersisartunut ersarissumik kaammattuutigineqartoq.
Tamanna peqqutaaqataasimassangatinneqarpoq kingullermik 2014-imi qinersisoqarmat Sisimiuneersunit isertoqarluarnissaa naatsorsuutigineqarsimagaluartoq eqquussimanngimmat. Ilaatigut Hermann Berthelsenimit oqaatigineqarpoq 2014-imi Sermitsiami atuarneqarsinnaasoq taamanikkut Sisimiuneersunit Siumumeersunit Inatsisartunut isertoqarsimannginnera Nuummi nuannaarutigigineqarsimasoq. Tamanna sakkortuumik Hermann Berthelsenip tigusimavaa, qineqqusaaleramilu sukasaatiginnguatsiarsimallugu. Soorlu qineqqusaarnermini oqarsimasoq:
- Sassarpugut sukataarluta, qinertigut.

 

Piviusunngortitsisartut pikkorinnerupput

Erik Jensen Politikerit timitaliisartut piviusunngortitsisartullu pikkorinnerusartut isumaqarpoq, Nunattalu pisariaqartitaasa annerpaartarigaat. Qineqqusaarnermi maluginiagassaavoq Sisimiuniit Kangerlussuarmut aqqusineqalernissaa kissaatigisupilussuugaa, oqarmammi tassunga suliniummut sukataarnerpaajulluni. Tassani parteeqataaneersoq Hermann Berthelsen tassunga aamma pimoorussiniarluni oqariartuuteqarpoq.

 

Aalisartut pitsanngorsaavigineqarnissaat

Henrik Fleischerip Inatsisartuniileruni suliniutigerusutaasa ilagivaat aalisartut atugaat pitsanngorsaavigineqarnissaat. Ilaatigut qineqqusaarnermini oqaatigaa Partii Naleraq naalakkersuisooqataalissagaluaruni sinerissamiittut KNAPP-mi siulittaasut, 90-ikkunilu ajortumeerneqarlutik eqqugaasimasut massakkullu aalisartitsisut tamarmik aggersarlugit tusarniaavigineqassasut. Taamaasilluni inatsisinik pitsanngorsaaniarnermi pitsaasumik angusaqarluartoqarniassammat.
Kingullermik Sisimiormiunik Naalakkersuisoqarsimanera Sisimiunut iluaqutaalluarsimanera Hermann Berthelsenimit isumaqarfigineqarpoq. Taamaattoqarsimanngitsuuppammigooq Sisimiut appariartuinnarsimassagaluarmat.

 

Sisimiormiut sukataarumapput 950px 02

Mange fulgte godt med i valgkampen i Sisimiut. (ass./foto: Johannes Ujo Müller)

 

Sisimiormiut sukataarumapput 950px 03

Bevaring af Kangerlussuaq blev godt debatteret. (ass./foto: Johannes Ujo Müller)