Kangerlussuup siunissaa suli qaamavoq

Inatsisartuni Naalakkersuisunilu Kangerlussuup siunissaa nutaamik nalilerneqaqqinnissaa partiit annerit taamatut nipeqarlutik oqariartuuteqarput. (ass./foto: Johannes Ujo Müller)

 

Qinersinerup ingerlanerani oqallisigineqartut oqimaannerit ilagaat Nunatsinni mittarfissaarsuit nutaat pilersinneqarniarsarisut pingasut, taakkulu malitsigisaanik Amerikkarmiut mittarfiliaat marluk siunissaat.
Amerlanerussuteqartut maluginiarneqarsinnaapput avaqqukkuminaatsinneqartutut mittarfissat pingasut pilersinneqarniarneqalersut. Ukiunut 25-nut Nunatsinnut 1,3 milliardit koruuninik sipaarutaassasoq misissuisut naliliipput. Naatsumik oqaatigalugu Kangerlussuup Narsarsuullu ullumikkut inissisimanerat akilersinnaanngitsutut nalilerneqarput.
Misissuisut naliliineri ilaatigut akerliusuniit upperineqanngillat, soorlu ilaatigut Kangerlussuup piujuaannarnissaanut takornariaqarnikkut inerisaaniarnerit pilersaarusiornerillu misissuinermi itisilerlugit misissuiffigineqarsimannginneri isornartorsiutigineqarluni.

 

Inernerit allatut isikkoqarsinnaasut

Partiini siuttuusartut Siumut aaliangiusimavaat mittarfissat nutaat pingasut pilersinneqassasut, Kangerlussuaq Narsarsuarlu pilersaarusiorniarneqarniarneri mianersortumik ingerlanneqassasut Siumut siulittaasuata Kim Kielsenip ersarissarpaa.
- Kangerlussuup heliportiinnartut inissinneqarnissaa, Siumumit kissaatiginngilarput. Assiliaq ajornerpaaffiatut isikkoqartillugu kisitsisit taakku saqqummiunneqarnikuupput. Taamaammat suliat taakku mianersorujussuarluni ingerlanneqarnikuupput. Taamaammat allatut isikkoqalernissaa naatsorsuutigisinnaavarput, Kim Kielsen tusagassiorfinnut oqarpoq.
Inuit Ataqatigiit siulittaasua Sara Olsvig misissueqqissaartoqarnerani inerniliussat isummerfigerusunngilai. Inatsisartuniit Naalakkersuisuniillu tamanna itisilerlugu oqallisigerusunnerullugu.
Nuna tamakkerlugu toqqaannartumik malinnaavigineqartumik Sisimiuni qineqqusaartoqarmat malinnaasut eqqaamasimassavaat Kangerlussuup piujuaannarnissaa qineqqusaartunit tamanit oqariartuutigineqarmat.
Naalakkersuisut inissititereerpata pissanganassaaq oqaatsit kusanartorpassuit qanoq kinguneqarumaassanersut.

 

kangerlussuaq suli qaamavoq 950px 03

Qeqqata Kommunia Kangerlussuup sianissaanut pilersaarutissaaleqinatik siunnersuuterpaaluit assigiinngitsut saqqummiuttareerpai. (ass./foto: Johannes Ujo Müller)