(ass./foto: Johannes Ujo Müller)

 

Arfininngormat Sisimiut timersortarfissuani sineriak tamakkerlugu malinnaaffigineqartumik qineqqusaarneq uummaarissoq ingerlanneqarpoq.

Timersortarfik inoqarlualaavippoq, partiillu tamarmik minutsimi ataatsimik ilisaritereersullu qinersisartut apeqquteqartarput.

Apeqqutigineqartoq siulleq tamanit immaqa ilimagineqareersoq, tassa Sisimiuniit Kangerlussuarmut aqqusinissaq pillugu aamma mittarfissaassat pingasut pillugit aperisoqarpoq.
Akissutigineqartut ilagaat mittarfinnik matooraasoqarnissaanik pilersaaruteqartoqanngitsoq mittarfinnilli inerisaasoqarnissaa angorusunneqartoq Siumumiit ilaatigut oqaatigineqarluni. Taamatuttaaq Kangerlussuarmiit Sisimiunut aqqusineq aningaasartuutitut isigineqassanngitsoq aningaasaliinertulli isigineqarnissaa ersarissaassutigineqarpoq.
Ilinniartut Nunatsinni nerisassat akisuallaarneri pillugit qanoq iliuuseqarfigineqassanersut apeqqutigineqarpoq.

Partiini tamami ilinniartut akissarsiaat qaffanneqarnissaat eqqarsaatigineqanngilaq, taamaattorli ulluinnarni atugaannik pitsanngorsaataasinnaasunik siunnersuutigineqarpoq.
IA isumaqarpoq ilinniartut saniatigut suliffeqaraangamik akileraartinneqartannginnissaat siunnersuutigineqarpoq. Nunatta Qitornai isumaqarput uuliap akia appartinneqarneratigut ulluinnarni atukkat soorlu nerisassat appartinneqarsinnaasut. Suleqatigiisitsisuniit pisiniarfinni ilinniartunut akikilliliivigineqartarneq atorluarneqarsinnaanera siunnersuutigaat. Atassummiit siunnersuutigineqarpoq meeqqerivinnut akiliisarnermik akikilliliivigineqarsinnaasut. Partii Naleqqamiit siunnersuutigineqarpoq Nunatsinnut nioqqutit eqqunneqarneranni akitsuutit kipisinneqarpata ilinniartut akissaqarnerulissasut. Siumut Demokraatillu isumaqarput aningaasat pisissutaasinnaasup nalingata ineriartornera ilinniarnermusianut malinnaatinneqartuarnissaa pingaartippaat.

Kommunerujussuit tallimat qangatut 17-inut allanngoqqinnissaat Nunatta Qitornaaniit siunnersuutigineqarpoq. Partiit sinneri isumaqanngillat allannguisoqassasoq allaffissornerujussuaq annertusinissaa kingunerissammagu.

Innarluutillit atugaat pitsanngortinneqarnissaat tamanit sulissugineqarusuppoq. Utoqqalinissamut ileqqaakkat ataasiaannarlutik akileraarfigineqartarnissaat tamanit isumaqarfigineqarpoq, taamatuttaarlu Nunatsinni akileraartarneq pisassasoq ersarissaatigineqarluni.

Aalisartuttaaq atugaat pitsanngorsaavigineqarnissaat qineqqusaartuniit oqaatigineqarpoq.

Qineqqusaartut akissutaat siunnersuutaallu siunissami piviusunngorumaassanersut pissangalluta utaqqimaaginnassagunarpagut. Tungaanut neriorsuutigineqartut puiguinnarneqaratik isiginnaagassiatigut naqitatigullu toqqorneqareermata qilanaarineqarlutik isumalluarfigineqarput.

Qinersineq pissaaq apriilip 24-ani.

Qineqqusaarneq 950px 02

Johanne Didriksenip Kangerlussuup Narsarsuullu piujuaannarnissaat tapersersormagu mittarfissat nutaat pingasut Nunatta akissaqarfiginngikkai qineqqusaartunut oqaatigaa. Oqallillualaavittoqarporlu. (ass./foto: Johannes Ujo Müller)

 

Qineqqusaarneq 950px 03

Sisimiut timersortarfiani toqqaannartumik sineriak tamakkerlugu qineqqusaartitsisoqarpoq. (ass./foto: Johannes Ujo Müller)

 

Qineqqusaarneq 950px 04

Sisimiut Timersortarfiani malinnaasoqarlualaavippoq. (ass./foto: Johannes Ujo Müller)

 

Qineqqusaarneq 950px 05

Qineqqusaartut ilai. (ass./foto: Johannes Ujo Müller)

 

Qineqqusaarneq 950px 06

Parteeqatiginngikkaluaraanniluunniit pattaattoqartarpoq. (ass./foto: Johannes Ujo Müller)

 

Qineqqusaarneq 950px 07

KNR-TV-kkut qineqqusaarneq kalaallisut ingerlanneqarpoq, danskisullu ingerlaannaq nutserneqartarlutik. (ass./foto: Johannes Ujo Müller)