Piniarnialeruit maligassiuigit

Tuttunniarnermi umimmanniarnermilu aallaasit eqqortut, pitsaasut nakersarneqareersimasullu atoqquneqarput. (ass./foto: Johannes Ujo Müller)

 

Isumannaatsumik piniarnissaq maleruaqqutigineqartunullu malinninnissaq pingaartinneqarlutik sunngiffimmi inuussutissarsiutigalugulu piniartartunut oqariartuutigineqarpoq.
Aasap ingerlanerani ukiariartulerneranilu piniarnermik soqutigisalinnut inuussutissarsiuteqartunullu tuttunniarneq umimmanniarnerlu nuannarineqartupilussuupput pinngitsoorneqarsinnaanatillu. Soqutigisalinnut tuttunniarnerup umimmanniarnerullu ammarnissaa qilanaarineqarluartarpoq, nalliuttuni sassaalliinissamut neqinik pissarsinissaq pingaartinneqartarluni.

 

Eqqaamasassat

Sunaluunniit malitassaqartarmat tuttunniartinnak umimmanniartinnallu Aalisarnermut Piniarnermut Nunalerinermullu Naalakkersuisoqarfimmiit ukua malitassat eqqumaffigeqquneqarput:

  • Akuersissutit taamaallaat inunnut 16-inik ukioqalereersimasunut tunniunneqarsinnaapput.
  • Akuersissutit inummut atiatigut taasamut taamaallaat atuupput allanullu tunniunneqarsinnaanatik tunineqarsinnaanatilluunniit.
  • Tuttunik pisaqarnissamut qoorortuut minnerpaamik .222-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Umimmannik pisaqarnissamut qoorortuut minnerpaamik 6,5 x 55-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Aallaasit tuttunik aamma umimmannik pisaqarnissamut atoqqusaasut nakersarneqarsimassapput pitsaasuussallutillu.
  • Tuttunniarnermi umimmanniarnermilu pisarineqartut neqaat tamaat pisaqarfimmiit nassarneqassaaq.
  • Assartuutit tuttunik umimmannillu piniarnermut, malersuinermut ungoorinermulluunniit atoqqusaanngillat, erseqqissaatigineqarluni umiatsianiit, biiliniit, timmisartuniit aamma qulimiguulinniit seqqortoqaqqusaanngitsoq.
  • Qimmit tuttunniarnermi umimmanniarnermilu nassatareqqusaanngillat.
  • Akuersissutit pisanik nalunaaruteqarnertalerlugit utertinneqarnissaat inatsimmi tunngaveqartumik piumasaqaataavoq.
    Umimmanniarnermi kulavaat norrallit aamma tiggaat piniaqqusaanngillat

Sunngiffimmi piniartut septembarip 30-ani inuussutissarsiutigalugulu piniartut oktobarip 15-iani kingusinnerpaaffigalugit piniarsinnaapput.

Piniarluarisi!