Kapisilinniarneq aallartippoq

Akuersissummik pissarseqqaarluni kapisilinniartoqarsinnaavoq. (ass./foto: Johannes Ujo Müller)

 

Ullumikkut aggustip 15-iani kapisilinniarneq aallartippoq, akuersissummilli peqarnissaq piumasaqaataavoq.
Sunngiffimmi inuussutissarsiutigalugulu aalisartunit kapisilittassiissutigineqartut katillugit 30 tonsiupput, 20 tonsit inuussutissarsiutigalugu aalisartunut sinnerilu sunngiffimmi aalisartunut.
Ukioq manna NASCO ukiumoortumik ataatsimiinnerminni NASCO-mi ilaasortat Nunarput ukiuni tulliuttuni pingasuni kapisilinnik 30 tonsinik pisaqarsinnaasoq akuersissutigaat.

 

Nunatsinniinnaq atorneqassapput

Pissassiissutigineqartut Nunatta kitaani atuuppoq, pisarineqartullu Nunatta avataanut tuneqqusaanngillat.
Inuussutissarsiutigalugu aalisartut tunitsivinnut kalaalimineerniarfinnullu taamaallaat pisatik tuniniarsinnaavaat. Pisarineqartut neriniartarfinnut, peqqissaavinnut assigisaannullu toqqaannartumik tunisisarunnaarput.

 

Qassutit tissukartartut atoqqusaanngitsut

Inuussutissarsiutigalugu sunngiffinnilu aalisartunut kapisilinniarnerminni qassutit tissukartartut atoqqusaajunnaarpaat.
Sunngiffimmi aalisartut taamaallaat namminneq atugassaminnik kapisilinniarsinnaapput.
Nalunaarummi allanneqarsimasumi pingaarnertut ersarissaassutigineqarpoq sunngiffimmi aalisartut kapisilinniarniarunik akuersissummik aatsaat pissarseqqaarlutik kapisilinniarnissaat.

Akuersissuteqarsimagaanni peqqussutaalissaaq qanorluunniit pisaqarsimanngitsigigaluaraanni decembarip aallaqqaataajutinnagu nalunaaruteqartarnissaq, taamaanngippat aappaagu akuersissummik tunineqarsinnaanavianngimmata.
Kapisilinniarneq oktobarip 31-at tikillugu atuuppoq.

 

NASCO Sunaana?

NASCO Atlantikup Avannaani kapisilinnik nujuartanik piujuaannartitsinissamik kissaateqartuulluni kattuffiuvoq.
Kapisilinnik nalunaaqutsersuisarnermik pilersaarut kapisillit nalunaaqutaannik utertitsinissamut kaammattuiniarluni pitsanngorsaaniarlunilu NASCO-mit ingerlanneqarpoq. Kapisillit qanoq siaruartigisimanerat ingerlaartarnerallu pitsaanerusumik ilisimasaqarfigilerumallugit nalunaaqutserneqartarput.
Kapisilinnut nalunaaqutsiussat Kalaallit Nunaani Pinngortitaleriffimmut nassiunneqartassapput.