2016-imi aalisarsinnaanermut akuersissutit

Aalisarnermut, Piniarnermut Nunalerinermullu Naalakkersuisoqarfiup 2016-imi aalisarsinnaanermut akuersissutit ulluni makkunani nassiussuutileruttorpai, tamatumunngalu atatillugu ima nalunaarutissaqarpoq:

Umiatsiaararsornermut akuersissutit

2015-imi umiatsiaararsorluni qaleralinniarnissamut, saarullinniarnissamut assagiarsunniarnissamullu akuersissutit atuunneri sivitsorneqarput, 2016-imi aamma atuussinnaassallutik.

Sinerissap qanittuani aalisariutit

Aalisariutit meterinik 6-inik anginerit aqutsiveqarfinni Upernavik, Uummannaq aamma Qeqertarsuup Tunuani aalisartut aalisarsinnaanermut akuersissutinik januaarimi nassinneqassapput, akuersissutit ukiumut pisassanik allaffigineqarsimassallutik. Taamaattumik 2015-imut aalisarsinnaanermut akuersissutit januaarip 31-annut 2016-imut atuutissapput, aalisarneq decembarip 31-ata 2015 kingorna ingerlaannarsinnaassalluni. 

Sinerissap qanittuani aalisarsinnaanermut aalisariutinut meterinik 6-inik anginernut akuersissutit, aqutsiveqarfik Upernaviup, Uummannap aamma Qeqertarsuup Tunuata avataani qaleralinniarnissamut aamma sinerissap qanittuani saarullinniarsinnaanermut akuersissutit ulluni makkunani nassiussuunneqarput. Taamaattoq ukiortaaq 2016 aallartissimalerpat aalisarneq ingerlaannarsinnaassaaq. 

Assagiarsunniarsinnaanermut akuersissutit ulluni makkunani nassiussuunneqarput.

Aalisariutit avataasiortut

Naalakkersuisut avataasiortunut pisassiissutit agguarneri ippassaq akuersissutigivaat. Ingerlatseqatigiiffiit 2016-imi aalisarsinnaanermut akuersissutissaat ullumi nassiussuunneqarput.