Umiarsualiviup eqqaani qilaluarniarneq kingunipilutsitsingajattoq

Sisimiut umiarsualiviata eqqaani qilaluarniarneq unioqqutitsinerusoq Politeeqarfimmiit oqaatigineqarpoq.

Sapaatiummat Sisimiuni umiarsualiviup eqqaani aalisartut piniartullu qilalukkamik pisaqarput. Aallaaniarneqarnerani annilaarnaqisumik Sarsuatsiivinnguup qulaani najugaqartut eqqartoqarnerani aqerloq illup iigaanut tuppoq.

Umiatsiat 12-it missaanniittut qilalugaq Kangerluarsummut pulasimasoq piniarneqarnerani Sisimiormiorpassuit alutorsaqalutik umiarsualivittaami malinnaarrapput. Eqqarpalulersullu inuit pissangallutik avaallattaraat.

Ilaqutariit Sarsuatsiivinnguup qulaani najugallit qilaluarniartut alapernaaffigaat. Sissamiit qutsiartumi inissisimagamik eqqarpallakkaangamik navianartorsiornermik sumik eqqarsaateqanngeruttorlutik tassanngaannaq iikkamut qanngorpallassuarmut tuparujussuarput.

- Angerlarsimarujoorluta, uanga igaffimmiitillunga panippullu ataatsimik ukiulik aneerasaartarfimmi barnevognimi sinippoq. Aappara qinngusersaarluni umiatsiat malersortut malinnaaffigai paasiniarlugu sumik malersornersut. Tassanngaannaq illu eqqorneqarpallappoq tupaqalutalu WC-mut iserpugut putusimasorlu iigaq takullutigu. Annilaaqaluta paasivarput iikkap eqqorneqarfia centemeterialunnik panitta barnevognianut qanitsigisoq, anaanaasoq Paneeraq Enoksen oqaluttuarpoq.

Ilaqutariit toqqissisimannginnamik angerlarsimaffitsik qimapallappaat, politiinullu kalerriutigalugu.

Paneeraq Enoksen annilaarsimaqisoq kingumut pisimasoq eqqarsaatigeqqajaasimavaa, pingaartumik panitsik eqqortissinnaasimanera eqqarsaatigeqqajaallugu. Qujamasoqaalli ajornerusumik kinguneqarsimanngimmat.

Unioqqutitsineq

Politiit qilalugarniartut biiliminnik qullitik kalerrisaartillugit unitsinniarsarisimagaluarpaat kinguneqanngitsumilli. Politiit ilaqutariit angerlarsimaffiat alakkarpaat aqerlup tuffia misissoriartorlugu.

Sisimiut politeeqarfianeersoq Johan Davidsen-ip uppernarsarpaa ilumut qilalugarniat eqqartillutik illu eqqorsimagaat.

- Pisoq maanna misissuiffigineqarluni ingerlavoq. Piniartut nalunngikkaluarpaat najugaqarfiit 500 miiterit iluanni qanitaanniitillutik aallaasinik atuineq inerteqqutaasoq, oqarpoq sumiiffimmi pisortaq Johan Davidsen.

Johan Davidsenip erseqqissarpaa qanorluunniit 500 miiterit sinnerlugit najugaqarfimmiit ungasitsigigaluaraanni najugaqarfiit tungaanut aallaariartannginnissaq. Politeeqarfimmiit naatsorsuutigineqarpoq sapaatip akunnera ingerlanerani qanoq kinguneqartitsiumaarnerlutik paasisitsissutigiumaarlugu.

 

Paneeraq Enoksenikkut illuat aqerlumik eqqortippoq. (ass./foto: Malik Lennert Heinrich)

Paneeraq Enoksenikkut illuat aqerlumik eqqortippoq. (ass./foto: Malik Lennert Heinrich)

 

Paniat aneerasaartarfimmi barnevognini sinippoq, aqerlullu tuffia ungasinngilaq. / Deres datter sov i sin barnevogn på altanen, og sov nogle centimeter fra skudhullet. (ass./foto: Malik Lennert Heinrich)

 

Sisimiormiorpassuit qilaluarniartut umiarsualivittaami malinnaaffigaat. / Mange borgere i Sisimiut fulgte fangsten fra den nye havn. (ass./foto: Johannes Ujo Müller)