Qaqortorsuarmi saffiugassat siulliit suliareqqiisarfimmukaanneqarput

(ass./foto: Hudson Greenland A/S)

 

Hudson Greenland A/S, Kangerlussuup eqqaani anorthositinut aatsitassarsiorfimmik ingerlatsisoq saffiugassat anorthositit qaartiterneqartut sapaatip akunnerata siuliani siulliit aatsitassarsiorfimmut suliareqqiisarfimmukaallugit aallartippaat. Maannakkullu atortut tamarmik misilerarlugit aallartillualaavippaat.

Neriorsuutaasimavormi ukioq 2018 naatinnagu Hudson Greenland A/S anorthositimik tunisassiorluni aallartinnissaa.
- Kalaallit Nunaata maannakkut marlunnik tunisassiorfiusunik aatsitassarsiorfeqarluni nunatut aatsitassarsiorfiulernera pingaaruteqartorujussuuvoq. Qeqertarsuatsiaat eqqaanni rubinisiorfik, maannakkullu tassa aamma Kangerlussuup eqqaani anorthositinik aatsitassarsiorfik. Kalaallit Nunaanni aatsitassarsiorfiit ingerlatsiviusut marloriaatinngornerat siunissami suliffissat amerlanerulernerannik aammalu nunap karsianut aatsitassarsiornermit isertitat amerlanerulernerannik, kinguneqassaaq. Taamaattumik Kangerlussuarmi tunisassiornerup aallartinneqarnera killiffittut pingaarutilittut isigineqassaaq, oqarpoq Aatsitassanut Suliffeqarnermullu Naalakkersuisoq Erik Jensen.

Tunisassiornermik suliaqarnerit taakkua ingerlanneqalerneranni, siunissami arlalinnik assingusunik suliaqartoqalernissaa Naalakkersuisut naatsorsuutigaat. Aatsitassanik neqerooruteqarnermut ujartuinermullu nunani tamalaani niuerfiit aamma neriulluarfigineqarput.

Anorthosit tunisassiaavoq ilaatigut fiberglasinik aamma plastinik tunisassiornermi atorneqarsinnaasoq.