DTU-mi misissuivittaat borgmesterip kunngissallu atoqqaartippaat

Atoqqaartitsineq malunnartinniarlugu Kunngissap Frederik-up Ilulissanit qeriuaannartumit misissugassanngorlugu tigusamik, Sisimiormiup eqqumiitsuliortup Barse Svendsen-ip kusassangaanik toormit sequmiineratigut ammarneqarpoq. - Som indvielsesmarkering hakkede Kronprins Frederik en permafrostkerne fra Ilulissat over med en ishakke, som er udsmykket af kunstneren Barse Svendsen fra Sisimiut. (ass./foto: Joachim Rode/RODE IMAGES)

 

Sabina Askholm Larsen-imit, DTU Byg

 

DTU Byg-ip misissuivittaani nutaat novembarip 28-ani atoqqaartimmatigit, Sisimiuniit peqataasoqarpoq.
Misissuivittaat nutaat, ilisimatusarnernut ilinniartitsinernullu ilaatigut Issittumi Teknologi-nngorniarfimmi ilinniartunit atorneqartassapput.

DTU Byg-ip Lyngby-mi misissuivittaat nutaat marluk, novembarip 28-ani atoqqaartimmatigit, natersuaq aappalaartoq siaarneqarpoq.

Pisortatigoortumik atoqqaartitsineq Ataqqinartorsuup Kunngissap Frederik-up, Ilulissanit qeriuaannartumit misissugassanngorlugu tigusamik, Sisimiormiup eqqumiitsuliortup kusassagaanik toormit sequmiineratigut ammarneqarpoq.

”Neriuppunga ilisimatusarnermi aalajangiisussamik aqqutissiuisussamillu sequmiinanga,” Kunngissaq Frederik ”maangaanniit pilluaritsi”-mik oqaaseqartigani, qeriuaannartumit misissugassanngorlugu tigusap toormit marlunngorlugu avitsinnagu quujasaaraluni oqarpoq.

Misissugassanngorlugu tigusap marlunngorlugu Kunngissap Frederik-up avitsissutigisaa tooq, Sisimiuni eqqumiitsuliortumit Barse Svendsen-imit ilusilersorneqarpoq. Tuup tigummivia tuttup nassuinit puisiliamit kusassaateqarpoq.

DTU-mut Kalaallit Nunaannullu nuannaarutaasumik suleqatigiinneq

Atoqqaartitsinermut atatillugu DTU-mi rektori Anders Bjarklev, COWI-mi Executive Vice President Lars Hauge aamma Qeqqata Kommuniani borgmesteri Malik Berthelsen oqalugiarput.

Qeqqata Kommuniata, KTI-p DTU-llu suleqatigiilluarnerat borgmesterip pingaartippaa. Kunngissap Frederik-up 2016-imi Arctic Circle Race-mut peqataanera, siornalu DTU-p Sisimiuni inaataasa nutaat atoqqaartinneqarnerini rektor Anders Bjarklev-ip Sisimiunut tikeraarnera oqalugiarnermini eqqaavai.

”Ukiut marluk matuma siorna, timersornermik nuannarisaqartuusugut Kunngissaq Frederik, uanga, peqataasullu 200-t 160 km-inik isorartutigisumut Arctic Circle Race-mut peqataavugut. Siorna rektor Anders tikippoq, peqatigalungalu DTU-p inaatai nutaat utaqqiisaagallartullu atoqqaartillugit. Kalaallit Nunaannik pingaartitsisunut Frederik (Kunngissaq, aaqqiss.) Anders-ilu ilaqutariinnut sinniisuupput, Kalaallit Nunaanniillu assinganik pingaartinneqarlutik”, Malik Berthelsen oqarpoq.

Ilisimatusarnernut ilinniartitsinernullu misissuiviit

DTU-mi misissuivittaani taakkunani marluusuni teknisk geologi, geoteknik aamma atuilluartumik sanaartornissami atortussat ineriartortinneqarnissaat immikkut sammineqartassapput. Ilisimatusarnerit Kalaallit Nunaannut immikkut aamma attuumassuteqartut.

”Misissuiviittaat taakku marluk nunarsuatsinni pitsaanersat ilagaat, inuiaqatigiinnullu iluaqutaanissatsinnik anguniagaqarnitta piviusunngortinneqarnissaannut pingaarutilerujussuullutik. Ilisimatusarnermi attaveqaatigut – assersuutigalugu ikaartarfiit, aqquserngit mittarfiillu – nunattalu ataa qanoq ’nutaaliornermi atorluarneqarsinnaanersoq’, taavalu ikaartarfiit, aqquserngit kuuffiit ussiitsut, toqqaviillu qupisimasut aserfallatsaalineqarnissaannut nukinnik qanoq ililluta sipaaruteqarsinnaanersugut immikkut sammineqartarpoq. Taamatullu immikkut sammisaqarnermi, issittumi pisariaqartinneqartunut nukitigullu aamma naleqquttunik atuilluartumik sanaartornissami atortussat ineriartortinneqarnissaat immikkut sammineqarluni," ammaanersiornermi DTU-mi rektori Anders Bjarklev, oqaaseqarnermini taamak oqarpoq.

Misissuiviit ilisimatusarnerinnarnut atorneqassanngillat. Siunissami ingeniørinngorniarumaartussat ilinniarnerminni aamma misissuivinni sulisinnaasussaapput. Issittumi Teknologi-nngorniat ilinniarnerminnik Sisimiuni aallartittartussat, misissuivinni sulisarumaarput.

”Arktisk ingeniøritut ilinniarfik 2001-imi aallartinneqarpoq, ilinniartullu Lyngby-mi DTU-mi ilinniartut peqatigalugit ilinniarnerminnik nangitsinissaat sioqqullugu, semesterit siulliit pingasut Sisimiuni atuagarsornermik ilinniarneq aallarnerneqartarpoq. 100-ssaanik Issittumi ingeniørinngortoqarnera juunip qaammataani peqatigiilluta nalliuttorsiutigivarput. Ilinniarneq ilutsilluaqaaq – DTU-llu Kalaallit Nunaanniinnermini ineriartortitseqqilluni ilinniarnertuunngorniarfimmik ammaanissaminik suliniuteqarnerani, Kalaallit Nunaanni nuannaarutigalugu ilusilersueqataaffigalugulu tapersersukkatsinnut aamma tunuliaqutaalluni,” Malik Berthelsen atoqqaartitsinermi oqalugiarnermini oqarpoq.

Pisortatigoortumik ammaanersioreernermi Kunngissaq Frederik qaaqqusallu arlaqartut, Malik Berthelsen ilanngullugu, ilisimatusarnerit paasisaqarfigisinnaallugit misissuivittaat alakkarterpaat.

 

Kronprins Frederik tuk Foto Joachim Rode 950px 02

 

Pisortatigoortumik ammaanersioreernermi Kunngissaq Frederik qaaqqusallu arlaqartut, Malik Berthelsen ilanngullugu, misissuivinni ilisimatusarnerit alakkarterpaat. Tassani professor Lisbeth M. Ottosen-ip oqaluttuaraa, elektrodialyse atorlugu arsakunit qanoq fosfor-jaasoqarsinnaanersoq. / Efter den officielle indvielse fik Kronprins Frederik og en række gæster, heriblandt Malik Berthelsen, indblik i en række forskningsaktiviteter i laboratorierne. Her fortæller professor Lisbeth M. Ottosen om, hvordan man med hjælp af elektrodialyse kan udvinde fosfor fra slamaske. (ass./foto: Joachim Rode/RODE IMAGES)

 

Kronprins Frederik tuk Foto Joachim Rode 950px 03

Qeqqata Kommuniani borgmester Malik Berthelsen-ip oqalugiarnermini, DTU-p Kalaallit Nunaannilu inuiaqatigiit suleqatigiilluarnerat pingaartillugu oqaatigaa. / Qeqqata Kommunias borgmester, Malik Berthelsen, lagde i sin indvielsestale stor vægt på det gode samarbejde mellem DTU og det grønlandske samfund. (ass./foto: Joachim Rode/RODE IMAGES)