Neriuffik nuna tamakkerlugu katersuiniarnera iluatsilluartoq

(ass./foto: KNR)

 

Arfininngormat nuna tamakkerlugu Neriuffik KNR-TV aqqutigalugu katersuiniarnerani 2 mio. kr. sinnerlugit pissarsiarineqarput.
Ukuit tamaasa ingerlanneqartalersimasoq, tassa nappaassuarmut kræftimut eqqugaasunut katersuiniarneq, Neriuffimmiit aaqqissuunneqartarpoq. Ukioq manna Katuami aaqqissuussineq toqqaannartumik malinnaavigineqarsinnaasimavoq, kikkulluunniit aningaasanik tuniserusuttut sms-ikkut imaluunniit sianernikkut oqaloqateqarluni tapersersuisoqarsinnaalluni. Aningaasanik tapersiiginnarani aamma eqquiniaatitsinermik ilaqartinneqarpoq. Tassanilu suliffeqarfiit tunniussaqarneratigut eqqugassat eqqorneqarsinnaasut makitsissutigineqarsimallutik.

Siornarniit pissarsinerupput

Neriuffiup siulittaasua Birthe Nielsen tulluusimaaqaluni unnukkut aqqarnup eqqaani qassinik pissarsisimanerlutik tusarliuppaa. Katillugillu katersarisimavaat 2.133.283 kr.
Siornaniit millionit affai missaanni amerlanerullutik.
- Unnummut nuna tamakkerlugu katersuiniarnermut peqataasunut tamanut qujanarujussuaq. Angusarineqartoq kusanaqaaq, aningaasallu atorfissaminnut atorneqassapput, Neriuffimmiit oqaatigineqarpoq.

Kalaallit oqaasii salliunneqarlik

Katersuiniarnerup kingorna sinerissamiit inuit malinnaasimasut assigiinngitsutigut aaqqissuussinermut qisuariaateqarput. Angusarineqartoq nuannaarutigineqaqaaq, taamaattorli qisuariaatigineqartoq annerpaaq tassaavoq katersuiniarnermi KNR-imi oqaluttuusut marluk oqaaseqartarnerat assuarineqarlunilu ilaatigut tapersersorneqartarpoq.
Isumaqartoqarpoq katersuiniarnermi qallunaatut oqalunneq salliunneqarpallaartoq, kalaallisullu oqalunneq kingulliunneqarpallaarsimalluni. Isumaqartoqarpormi sinerissami malinnaasut kalaallisut paasisinnaanerusut amerlanerpaajusut, taamatuttaaq danskisut paasisinnaanngitsut aamma amerlallutik. Taamaasillutik kalaallit oqaasii salliunneqarnerunissaat sakkortuumik kissaatigineqarluni. Ilaqarporli sakkortuumik tamanna akerleralugu qisuariartunik ilaatigut oqaatigalugu akerliuniaannaratik taamatut ajunngitsumik katersuiniartoqarnera qutsatiinnassagaat.