Kangerlussuarmi atuarfik nunatsinni ingerlalluarnerpaaq

Atuarfiup ingerlalluarnerani paggatsitsisoqarpoq. (ass./foto: Qeqqata Kommunia)

 

Kangerlussuup siunissaa nalornissutaaqisoq toqqissisimanngissutaaqisorlu eqqartorneqaqattaartoq, meertartaasa muminganik nuannersumik atuarfimminni ingerlalluaqisut tusarliunneqarpoq.
Tamanna pivoq Qeqqata Kommuniani kommunalbestyrelsi tallimanngormat Kangerlussuarmiinnerani nalliuttorsiutigineqarmat.
Ukioq 2017-imi inaarutaasumik misilitsinnerit tunngavigalugit nunatsinni atuarfiit pitsaanersaattut inissisimasoq paasissutissiissutigineqarpoq.

 

Tuluttuullammaat

Qinnguata atuarfiani atuartut naammassisut pinngortitalerinermi, kisitsinermi qallunaatoornermilu allattariarsornermi pitsaanerpaamik karakterillit sisamaanni inissipput. Kalaallisoornermili suli pitsaaneruvoq, atuarfik karakterini pitsaanerit pingajuanni inissimmat.
Tupigusuutigisassaavallaarunanngilarlu amerikkarmiut pilersitaanni maanna atuartut tuluttoornermut agguaqatigiissitsinermi nunatsinni annerpaamik inissimmat. Taamaasillutik minnerpaamik fagini pingaarnerni tallimaasuni, atuarfiit tamarmik misilitsissutigisartagaanni, agguaqatigiissillugu qaffasinnerpaat sisamaattut inissillutik.

- Qeqqata Kommuniani oqaatsinik ilinniartitsineq ukkataraarput aammalu tuluttoorneq 1. klassimiit aallartittalernikuullugu. Kisianni kalaallisoornermi tuluttoornermilu pikkorinnissap akornanni imminut akerleriissutaasinnaasunik takusaqarsinnaanngilagut. Tamanna Qinnguata Atuarfiata takutippaa, oqarpoq Ilinniartitaanermut, Peqqinnermut, Sunngiffimi sammisanut Kultureqarnermullu ataatsimiititaliami siulittaasoq tulluusimaaqisoq Evelyn Frederiksen.

Qeqqata Kommuniani borgmesteri Malik Berthelsenip Qinnguani atuarfia angusarissaarnera nersualaarpaa, taamatuttaarlu angajoqqaajusut ilaat Birk Eli Bakker-ip Kangerlussuarmi atuarfik pillugu nersualaarinneqataalluni. Atuarfiup aamma pikkoriffigivaa atuartut meeqqat atuarfianiit ilinniaqqinniarlutik ingerlariaqqinnissaannut periarfissarsiuussisarnerat, ilinniartitsinerillu inerisartuarneqartarnerat taamaasillutik pissanganarninngortittarlugit nutaamillu pilersitsisinnaanermik imaqartinneqartarlutik.

Angusarissaarneq atuarfimmi persuarsiorfigineqarpoq ilaatigut paggatsitsisoqartarluni.

 

Kangerlussuup atuarfia950px 02

Ukioq 2017-imi inaarutaasumik misilitsinnerit tunngavigalugit Kangerlussuarmi Qinnguani Atuarfik nunatsinni atuarfiit pitsaanersaraat. (ass./foto: Qeqqata Kommunia)