USA Kangerlussuarmut iluaquseeratarsinnaavoq

Amerikkarmiut Nunatsinnut soqutiginninnerat tassunga Kangerlussuup peqqutaanissaa Qeqqata Kommunianit neriuutigineqarpoq. (ass./foto: Johannes Ujo Müller)

 

Nunatsinni illoqarfiit mittarfilerngusaatiinnaleqqasut Amerikkarmiut akulerukkusuleqqanera Qeqqata Kommuniata isumalluarfigaa.
Naalakkersuisoqarfimmiit Kangerlussuaq pingaarnersatut siullertut inissisimatinngikkaluaraat Amerikkarmiut pingaarnersatut inissisimateratarsinnaavaat.
Amerikkarmiut Nunatsinni mittarfiliornissanut pilersaarusiornerat tusarsimallugu Danmarkimi amerikkarmiut Københavnimi aallartitaqarfiata Facebookikkut Twitterikkullu soqutiginninnertik tusarliuppaat.

 

Aaja mianersoqqusivoq

Folketingimi ilaasortap Aaja Chemnitz Larsenip Amerikkarmiut suna peqqutigerpiarlugu soqutiginninnersut paaseqqaarusuppaa. Amerikkarmiut qanoq pilersaarnermik nalunaaruteqarnerisa Pituffimmilu kiffartuussinissamut isumaqatigiissutit pillugit oqaloqatigiinnerit maanna ingerlaqqittut imminnut attuumassuteqarnersut paaseqqaarusuppai. Taamatuttaarlu illoqqarfiit nunaqarfiilluunniit sorliit amerikkamiut aningaasaaliiffiginiarneraat apeqqutigisimavaa.
Kangerlussuaq ullumikkut ajornartoornermi mittarfissatut amerikkarmiut illersorneqarfiata atorsinnaatitaagaat oqaatigineqarpoq. Aamma ‘ajornertoornermi, akerleriissuteqartoqarnerani imaluunniit sakkutuut sungiusarnerannut’ atatillugu mittarfik atorsinnaallugu. Kangerlussuarmili mittarfik annertuumik millisinneqassappat imaluunniit qulimiguulinnuinnaq mittarfinngortinneqassappat amerikkarmiut periarfissaq taanna annaassagaat oqaatigineqarluni.

 

Malik isumalluarpoq

Amerikkarmiut mittarfiliornissanut soqutiginnittoq mianersoqqussutigineqaraluartoq Qeqqata Kommuniani borgmesteri Malik Berthelsen isumalluarpoq.
- Kangerlussuup siunissaa suli nalunartorujussuuvoq. Inatsisartut qanoq aaliangernissaat Naalakkersuisunit utaqqineqarpoq, tamannalu pissanngatigisorujussuuarput, oqarpoq Malik Berthelsen.
Kangerlussuup qanoq atorluarneqartiginera periarfissagissaartigineralu nuna tamakkerlugu qinikkanut paasitinniartorujussuusimavaat, neriuutigalugulu taamaasiorsimanerat iluaqutaasimassasoq.
Amerikkarmiut nunatsinnut soqutiginninnerat Kangerlussuarmut sunniuteqarnissaa neriuutigineqarpoq.
- Neriuppunga, neriuttorujussuuvunga amerikkarmiut Nunatsinnut soqutiginninnerminni Kangerlussuaq eqqarsaatigisimagaat. Amerikkarmiummi Kangerlussuarmiittartut pitsaasumik kommunemiit suleqatigineqartarput. Kisianni periarfissarsiuunnissaannut nunanullu allanut tunngasut Naalakkersuisut akisussaaffigivaat, oqaatigeqqiinnassavara neriuppunga Kangerlussuaq pineqarsimassasoq, borgmesteri isumalluaqisoq oqarpoq.

 

Taamaanngippat katataaneq

Qeqqata Kommunia takornariaqarnikkut ineriartortoqassappat Sisimiuniit Kangerlussuarmut aqqusineq pinngitsoorneqarsinnaanngitsoq oqaatigaa. Taannaammat takornarissat amerlisarnissaannut neqeroorutillu pilerinarsarnissaannut aqqutissaasoq. Siunissami Nuummi Ilulissanilu mittarfissualiortoqarsimalluni Kangerlussuarmullu aqqusinniortoqarsimanani Qeqqata Kommunia takornariaqarnikkut katataanissaa unittoornissaalu ernumanartinneqarpoq.
Kangerlussuaq siunissaqartoq isumalluarfigineqarpoq.
- Qanoq atorneqartiginera takusinnaallugu aammalu takornarialerisunit qanoq upperineqartigineranik oqariartorfigineqartartilluta, upperilluinnarpara mittarfiup takissusaata paariinnarneratigut neqeroorutillu unnuisarfiillu tungaasigut pitsanngorsaanitsigut siunissaqarnissaa. Tassami Nuummi mittarfiliornikkut, Kangerlussuarmi neqeroorutit Nuummut nuuginnarneqarsinnaanngillat, tamakkua Nuummi pigineqanngimmata, Malik Berthelsen naggasiivoq.

 

amerikkarmiut kangerlussuarlu 950px 02

Qeqqata Kommuniani takornariaqarnikkut ineriartortoqassappat Sisimiuniit Kangerlussuarmut aqqusineqalernissaa pinngitsoorneqarsinnaanngitsoq oqariartuutigineqarpoq. (ass./foto: Johannes Ujo Müller)