Nunatta aquttuisa ilai tunuarput

Naalakkersuisut maanna inissisimasut. (ilus./illustr: Johannes Ujo Müller) 

 

Sapaatiummat Partii Naleraq Naalakkersuisooqatigiittut tunuarmat Naalakkersuisoqarfiit marluk allanik inuttalerneqarput.
Partii Naleqqap siulittaasuata Hans Enoksenip Kim Kielsenimiit salloqittagaasutut misigaluni nalunaaruteqareersorlu Naalakkersuisooqatigiinniit tunuarput.
Isumaqatigiinngissutigineqartoq tassaaneruvoq Nunatsinni mittarfiliortiternissat pillugit naapeqatigiissinnaannginneq.
Piffissami sivitsulersumi Naalakkersuisoqatigiinni aaqqiagiinnginneq atuussimavoq. Nuummi Ilulissanilu mittarfissualiornissat Paartii Naleqqap isumaqatiginagit mittarfinnik naannerusunik sanaartornissaq orniginerugaluarpaat. Taamatuttaarlu kissaatigalugu Ittoqqortoormiini Qaanaamilu pisassiissutit killilersorneqarunnaarnissaat.

Paarlatsit marluk

Aningaasaqarnermut Naalakkersuisuusimasoq Pele Broberg tunuareersorlu maanna Vittus Qujaukitsup akisussaaffik tiguaa. Vittus Qujaukitsup aamma Aatsitassanut, Suliffeqarnermut, Nunamut Namminermut Nunanilu Avannarlerni suleqatigiinnermut Naalakkersuisuuffigaa.
Isumaginninnermut Inatsisinillu Atuutsitsinermut Naalakkersuisuusimasoq Anthon Frederiksen taarsiullugu maanna naalakkersuisoqarfik Doris Jakobsen Jensenip akisussaaffigilerpaa. Doris Jakobsen Jensen aamma Peqqissutsimut Ilisimatusarnermullu Naalakkersuisuuffigaa.
Naalakkersuisut allanngornerata kinguneranik allanik naalakkersuisoqarfinnik allannguisoqanngilaq.

 

naalakkersuisut 550px 02

Aningaasaqarnermut naalakkersuisoqarfik Vittus Qujaukitsup ataaniilerpoq. (ass./foto: privat/facebook)

 

naalakkersuisut 567px 03

Isumaginninnermut Inatsisinillu Atuutsitsinermut Naalakkersuisoqarfik Doris Jakobsen Jensenip ataaniilerpoq. (ass./foto: privat)