Aningaasaleeqataanissamut atsioqatigiinneq

Katillugit 1,6 milliardit Naalagaaffimmiit aningaasaliissutigineqarnissaat atsioqatigiissutigineqarput. (ass./foto: KNR-TV)


Naalakkersuisooqatigiit allanngoruttulersut Danmarkimi statsministeri Lars Løkke Rasmussen ataasinngormat Kim Kielsen atsioqatigiartorniarlugu Nuummut tikippoq. Atsioqatigiissutaat Nuummi Ilulissanilu mittarfiliornissamut katillugit 1,6 milliardinik naleqartoq imaqarpoq. Tamannali piviusunngornissaa suli qulakkeerneqanngilaq. Amigaatigaammi suli Inatsisartuni Folketingimilu amerlanerussuteqartunit akuerineqarpat atsioqatigiissut aatsaat atuutilissammat.
Danmarkimi partiit Socialdemokratiet, De Radikale aamma Dansk Folkeparti atsioqatigiinnermut tapersersuinerat Statsministerip uppernarsarpaa.

Isumaqatigiissut

Isumaqatigiissummi atsiorneqartut makkuupput:

  • Naalagaaffimmit Kalaallit Airportsimut 700 million koruuninik aningaasaliisoqassaaq. Naalagaaffik 33,3 procentimik piginneqataalissaaq.
  • Den Nordiske Investeringsbankip 450 million koruuninik atukkiinissaa Naalagaaffimmit qulakkeerneqassaaq.
  • Taakku saniatigut Naalagaaffik 450 million koruuninik atukkiissaaq.
  • Greenland Venture-mut Vækstfondenimullu Namminersorlutik Oqartussanit aamma Naalagaaffimmit 100 million koruuninik aningaasaliisoqassaaq.
  • Inuussutissarsiornerup ineriartornissaa anguniarlugu fondiliortoqassaaq, aningaasat suliniutinut 200 million koruuninik imaqassaaq.

Kim Kielsenip oqaatigaa atsioqatigiinneq Nunatsinnut iluaqutaalluarnissaa, aamma Nunatta Danmarkillu akornanni.
Atsioqatigiinneq tamanit nuannaarutaanngilaq. Atsioqatigiinnermi Hans Egedep illorsuani pisumi silataaniipput akerliussutsimik takutitsillutik ingerlaaqatigiissimasut 70-it missaanniittut. Akerliussutsimik takutsitsineq Partii Naleqqamit aaqqissuunneqarpoq.

Hermann naammagittaalliorpoq

Atsioqatigiittut isumaqatigiissutigisaat pillugu Aningaasaqarnermut ataatsimiititaliap isornartorsiorpaa. Ataatsimiititaliammi mittarfiliortiternissaq pillugu siunnersuummik upernaarli suliaqarsimavoq, taamaattorli isumaqatigiissutip imarisaanik ilisimatinneqarsimanatik.
- Isumaqatigiissutip atsiorneqannginnerani imarisaanut isummerfiginninnissamut periarfissinneqannginneq ataatsimiititaliamit naammagineqanngilluinnarpoq, ataatsimiititaliap siulittaasua Hermann Berthelsen oqarpoq.
Ataatsimiititaliap Kim Kielsenip isumaqatigiissummik atsioqatigiissuteqannginnissaa kaammattuutigisimagaluarpaa. Tamannali tusaajumaneqanngilaq.
- Ataatsimiititaliap suliassamut akuliutsinneqannginnera, mittarfissat pillugit inatsisissatut siunnersuummik ataatsimiititaliamut innersuussinikkut, Inatsisartunit suliakkiunneqartumut ataqqinninnginnertut taamaallaat paasineqarsinnaavoq, Hermann Berthelsen taama tusagassiorfinnut allappoq.

 

aningaasaliinissamut atsioqatigiinneq 950px 02

Atsioqatigiinneq Inatsisartuniit Folketingimiillu isumaqatigineqanngippat Kim Kielsenip atsioqatigiissut imatut atorunnaarsissinnaavaa. (ass./foto: KNR-TV)

 

aningaasaliinissamut atsioqatigiinneq 950px 03

Isumaqatigiissummik atsioqatigiinneq Hermann Berthelsenip ataatsimiititaliamiittullu ataqqinninnginnertut paasivaat. (ass./foto: Johannes Ujo Müller)