Sisimiuniinngikkaluarlutit ilinniakkamik ingerlatsisinnaalerputit

(ass./foto: Johannes Ujo Müller)

 

GUX-imi Sisimiuni Ilinniarnertuunngorniarfinni ilassutitut aamma ilinniartitsissutini ataasiakkaani ilinniartitaaneq pinngitsoorani Sisimiuni najugaqarluni ilinniarnissaq piumasaqaataasarsimasoq maanna ukiamiit najugaq qimanngikkaluarlugu ingerlanneqarsinnaalissaaq.

GUX Sisimiut, Ilinniartitaanermut, Kultureqarnermut Ilageeqarnermullu Naalakkersuisoqarfik suleqatigalugu misiliutitut suliniummik pilersitsereersorlu ilinniarnertuunngorniartarnermi ilassutitut pikkorissarnernik aamma ilinniartitsissutini ataasiakkaani pikkorissarnernik, ungasissumiit ilinniartitaanertut aaqqissuussaasunik neqerooruteqartarlerpoq.
Taaguutaat imaalerput: eGSK aamma eGENK. Taakkuupput e-Ilinniarnertuunngorniartarnermi ilassutitut pikkorissartarneq aamma e-Ilinniarnertuungorniartarnermi ilinniartitsissutini ataasiakkaani pikkorissartarneq.

Tassa imaalerpoq ilinniartoq atuartitsineq soraarummeernerlu internet aqqutigalugu ingerlassinnaalissavaa. Ilinniartitsissutigineqarsinnaalertussat makkuupput: Qallunaatut A, Matimatikki B, Tuluttut B aamma Uumassusilerineq C.

eGSK tassaavoq ilinniarnertuunngorniartunut ilinniarnertuunngorniarnermi ilinniartitaanermik naammassisaqareersimasunut, kisiannili ilinniartitsissummik amigaateqartunut, imaluunniit qaffasissutsimik naammassisaqarumasumut qaffasinnerusumik ilinniartitaanermut aalajangersimasumut isersinnaajumalluni.

eGENK inunnut meeqqat atuarfiannik naammassisaqarsimasunut september 2018 sioqqullugu, kissaateqarlutillu ilinniarnertuunngorniarfimmi ilinniartitsissummi ataatsimi ilinniartitsissutiniluunniit arlaqartuni pikkorissarnissamik tulluarsagaavoq. Ilinniarnertuunngorniarfimmi ilinniartitsissutit ataasiakkaat tassaanngillat ilinniarnertuunngorniartarneq ataatsimoortoq, kisiannili ilinniartitaanerup ataatsimoortup ilagisinnaallugit.

Soqutiginnittut kikkulluunniit kingusinnerpaamik aggustip tallimaani qinnuteqarsinnaapput.