Mittarfiit Kangerlussuarlu oqallisaajuarsinnarput

(ass./foto: Johannes Ujo Müller

 

Mittarfiit nutaat pingasut pilersinneqassanersut suli qulakkeerneqanngilaq, taamatuttaaq Kangerlussuup siunissaa.

Ulluni makkunani Inatsisartuni oqallisaalluarput Nunatsinni angallannikkut pilersaarutit qanoq siunissami isikkoqassanersut. Siumut Inatsisartuni siunnersuutigigaluarpaat juulip qaammataani mittarfissat nutaat pillugit aaliangiisoqarnisaa. Tamannali pipallatatut isigalugu illuatungiliuttut sakkortuumik isornartorsiorpaat. Maanna siunnersuutaagaluartoq taamaatiinnarneqarpoq.
- Tuaviuussisoqarnera pitsaasuunngilaq, tassami paasissutissanik amigaateqartoqarpoq. Inatsisartuni ilaasortat paasissutissat pisariaqartippaat, Sara Olsvig ilaatigut tusagassiorfinnut oqarpoq.
Misissuinerit sukumiinerusut pisariaqartinneqartut isumaqarpoq, tamannalu Demokraatinit taperserneqarluni.

 

Kangerlussuaq piujuaannarli

Kangerlussuup piujuaannarnissaa siunertaralugu Qeqqata Kommuniani borgmesteri Malik Berthelsen, Arctic Circle Business-imilu (ACB) siulittaasup tullia Henrik Sachse aamma Sisimiuni GE-mi siulittaasup tullia Miki Brandt, assammipput.
- Kalaallit Nunaanni nunaqarfiit ingerlalluartut nuunneqaraangata matuneqaraangataluunniit kinguneqarluarneq ajunngisaannarpoq. Naalagaaffiup Naalakkersuisulluunniit suliassaq artorpassuk, taava uagut Qeqqata Kommunianiit tigusariaqarparput, illuatungeriit pingasuullutik taama oqarput.
Kangerlussuarmi mittarfiup, Nuummilu mittarfiup tallineqarnissaata akornanni naapertuilluartumik unammilleqatigiinnissaq illuatungeriit qilanaaralugu oqariartuuteqarput.

 

Selskabi nutaaq

Qeqqata Kommuniani kommunalbestyrelse Kangaamiuni ataatsimiinnerani kommunimi attaveqaqatigiinnermi atortulersuutit annertunerusut katersuutsilernissaat siunertaralugu, kommuni piginneqatigiilluni selskabimik pilersitsinissaa akuersissutigaa. Selskabi A/S Arctic Circle Traffic-imik taaguuteqassaaq.
Sisimiuni kommunip talittarfiutaa aamma Sermersuup Kellyvillellu akornanni aqqusineq Qeqqata Kommuniata aallaqqaammut selskabimut aningaasaliissutiginissai pilersaarutaavoq.

Malitsigisaanik selskabemut ataatsimoorussami Kangerlussuarmi mittarfimmi Namminersorlutik Oqartussat aningaasaliisinnaasut periarfissaatinneqarpoq. Naalakkersuisut ataatsimoorussamik selskabimut piginneqataajumanngippata, Kangerlussuarmi mittarfik Qeqqata kommuniata 1 koruunimik akilerlugu pisiarinissaa neqeroorutigerusuppaa.
- Aalajangiinikkut, kommunimut tamarmut minnerunngitsumillu Kangerlussuarmi innuttaasunut iluaqutaasussamik, Kangerlussuup mittarfeqarfittut, takornariaqarfissuartut kiisalu sukisaarsarfittut ineriartortinneqarnissaanut Qeqqata kommunia piareersimavoq. Immikkoortumi periarfissat upperaagut, aammalu mittarfik nunaqarfillu sorsuutigissallutigit. Kangerlussuup Mittarfiani unammillernartut Namminersorlutik Oqartussanit ilisimasaqarfigineqanngippata, taamatullu mittarfik upperinngippassuk, sumiiffimmi piginnittoqarnissaq pingaaruteqarpoq, borgmester Malik Berthelsen oqarpoq.

 

Mittarfiit oqallisaapput 950px 02

Arctic Circle Business-imi (ACB) siulittaasup tullia Henrik Sachse aamma Sisimiuni GE-mi siulittaasup tullia Miki Brandt, kiisalu Qeqqata Kommuniani borgmesteri Malik Berthelsen tapersersoqatigiipput. (ass./foto: ACB)

 

Mittarfiit oqallisaapput 950px 03

Qeqqata Kommunia selskabimik nutaamik pilersitsinialerpoq. (ass./foto: Qeqqaat Kommunia)