Nunatsinni Nipilersortartut akileraartarunnaarusupput

(ass./foto: Johannes Ujo Müller)

(ass./foto: Johannes Ujo Müller)

Nunatsinni Nipilersortartut kattufiata nipilersortartut tusarnaartitsinerminnit akissarsiaat akileraartarunnaartikkusuppai, pissarsiarineqartartut amerlannginneri peqqutigalugit.
Tusarnaartitsiniarnermi piareersarnerit annertuut, tusarnaartitsinnginnermi sungiusarnerit, assartuinerit, atortut nammineq pigisat nalingi atorneri, taakkuupput ilaatigut akileraartarunnaarusunnermut tunngavigineqartut.
Nunatsinni Nipilersortartut kattuffiata siulittaasuata Inunnguaq Petrussen-ip nunatsinni nipilersortartuunerup imminut akilersinnaasariaqartoq isumaqarfigaa.
Nipilersortartorpassuit siunnersuummut isumaqataanissaat immaqa naatsorsuutigineqarsinnaagaluartoq, ilaqarporli akileraartarnertik ingerlatiinnarusullugu aaliangiusimasunik.
Nunatsinni nipilersornermik ilisimaneqarluartoq Mike Fencker Thomsen akileraartarnini ingerlatiinnarusuppaa qaqugukkulluunniit nakorsiartarusukkami aammalu kigutileriffiliartarusukkami.

Qinikkat periarfissiisut

Siunnersuutigineqartoq Kultureqarnermut Naalakkersuisoq Doris J. Jensen-ip misissuiffigineqarnissaa anguniarlugu suleqatigiisitamik pilersitsisoqarniartoq oqaatigineqarsimavoq. Taamatuttaaq kultureqarnermut ataatsimiititaliaani siulittaasoq Mimi Karlsen akuersaarpaluttutut nipeqartoq maluginiarneqarsinnaavoq.
- Arlaatigut akileraarutit allanngornerisigut, akileraarutikinnerulernikkut periarfissanik ujartueqataajumavugut, Mimi Karlsen oqarpoq.

Nipilersortartut namminneq sanaatik aamma saqqummersitatik pisiarineqaratik kopiiginnarneqartarnerat ajornartorsiutaasoq aamma siornatigut saqqummiunnikuuaat. Maannalu nipilersortartut atukkaminnik iluarsiissuteqartoqartariaqalernera tusagassiutitigut kattuffitsik aqqutigalugu saqqummiuppaat.
- Akissarsiarisartakkagut annertunngimmata, soorlu bandimut sisamaalluta 10.000-innassimagutta, taakkulu sisamanngorlugit agguarutsigit akileraarlutalu, taava 1.450 koruuni sinnerussaaq. Taakkuuppullu sungiusarnerpassuit, atortorissaarutit pisiagut, assartuinerit
atortunillu ikkussuinermut atortussat. Tassa tiimerparujussuupput, akissarsissutigineq ajukkagut, Inunnguaq Petrussen Qanorooq aqqutigalugu taamatut oqaaseqarpoq.

Koncert i SisimiutNipilersortartut akileraartarunnaarusupput suliatik pitsaanerusumik ingerlakkumallugit. (ass./foto: Johannes Ujo Müller)