Sisimiut ilinniartoqarfissuunera annertuseqqerialerpoq

Naalakkersuisut aaliangerput Nuummi Saviminilerinermik Ilinniarfik Sisimiunut nuunneqarnissaa. Tamanna nuannaarutigineqarlunilu iluarineqanngilaq.
Naalakkersuisut siorna neriorsuutaat eqquutsinneqarnialerpoq, isumaqatigiissutaasimavormi suliffeqarfiit Nuup avataanut siammarterniarneqarnissaat, taamaasilluni Nuuk annerusumik suliffeqarfinnik ineriartorfiusimasoq sinerissamut periarfissanik assigiinngitsunik atorluarneqarnialerlutik.
Nuussinissamut siunnersuutit sisamat nalilersuiffigineqarsimapput, soorlu aningaasarsiornermut tunngasut sulisussaqarniarnikkullu nuussinerup kingunerisinnaasai. Isumaliutersuutinilu aamma ilaasimavoq nuussinerit nunamut tamarmut aammalu kommunini immikkoortunut pilersaarutaasut killiliussaasa iluini pisarnissaat. Nuussinissanut siunnersuutit sisamaasut tassaasimapput Saviminilerinermik Ilinniarfiup Sisimiunut nuunneqarsinnaanera, Niuernermik Ilinniarfiup (NI-Nuuk) Qaqortumut nuunneqarsinnaanera, Isumaginninnermi siunnersortitut ilinniartitaanerup Ilulissanut nuunneqarsinnaanera aammalu Eqqumiitsuliornermik Ilinniarfiup Aasiannut nuunneqarsinnaanera.
- Naalakkersuisut ilinniartitaanerni nuunneqartussani ineriartortitsinissamut periarfissat takusinnaavaat. Uanga tunginniit piumasaqaataasimavoq nuussineq ilinniarfimmut iluaqusiisinnaassasoq, maannalu naliliisoqarsimalerpoq aningaasarsiornikkut aamma ilikkagassat tungaasigut ilinniakkanik pineqartunik nuussinissat iluaqutissartaqartut. Taamaattumik qilanaaraakka sunniutaasussaajumaartut takunissaat, ilinniarfinnik taakkuninnga nuussinerit ilinniartitaanerni kinguneriumaagaat, ilutigisaanillu kommunit qutsavigiumavakka suleqatigiinnermut pitsaasumut, oqarpoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris J. Jensen.

Borgmestererput qilanaarpoq

Qeqqata Kommuniani borgmesteri Malik Berthelsen Naalakkersuisut nersualaarpai, Saviminilerinermik Ilinniarfiup Sisimiunut nuunneqarnissaanut suliniummik aallartitsimmata eqqortumillu aaliangiisimammata.
Teknologiimik ilinniarfiit Sisimiuni katersuunneqarnerisigut, ilinniarfiit taakku sunniivigeqatigiissinnaalissapput.
- Sisimiuni KTI-mut / Tech College Greenland-imut atalersinneqarneratigut, assassortunngorniarluni ilinniartut, Aatsitassalerinermik Ilinniarfimmut, DTU-llu ataani Issittumi ingeniørinngorniarfimmi ilinniartitsisunut ilinniartunullu allanut attaveqarsinnaalernermikkut ilinniartunut atugassarititaasut pitsaanerulissapput, Malik Berthelsen tusagassiorfinnut oqaaseqarpoq.

Ilinniartitsisut Saviminilerinermik ilinniarfimmiittunut tamanna iluaqutissartaqartoq oqaatigineqarpoq. Ilinniartitsisut ukiorpassuarni misilittagaat, KTI-p sinneranut kivitseqataasumik pingaaruteqassallutik.
Ilinniartitsisulli Nuummiittut toqqissisimanngillat. Qaqugu nuussanerlutik suli nalummassuk, siunissartillu qanoq isikkoqarumaassanersoq nalornissutigimmassuk, nooqataassanngikkunillu allamut atorfimmut suliffissarsiornissartik eqqarsaatigineqarluni. Amerlanerit nuunniaratik oqarsimapput. Tamannali forstanderip Jokum Møllerip ajornartorsiutitut isiginngilaa. Sulisussarsiornissaq misilittagaqarfigereermassuk nutaanik ujaasinissaq piumaartoq oqaatigaa.

 

Sisimiut Uddannelsesby 950px 02

Uanga tunginniit piumasaqaataasimavoq nuussineq ilinniarfimmut iluaqusiisinnaassasoq.” Doris J. Jensen. (ass./foto: Johannes Ujo Müller)

 

(ass./foto: Johannes Ujo Müller)“Ilinniartitsisunut ilinniartunullu allanut attaveqarsinnaalernermikkut ilinniartunut atugassarititaasut pitsaanerulissapput.” Malik Berthelsen. (ass./foto: Johannes Ujo Müller)