Suliffissaaleqisut ikiliartortuarput

Suliffissaaleqisut ikiliartortuarput

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup 2016-imi maajip aallaqqaataani oqalugiaataa

Ullumi tassa sulisartut ulluat, nunarsuarput https://www.viagrapascherfr.com/viagra-bayer/ tamakkerlugu nalliussineqartartoq.
Sulisartut ullumi nunarsuatsinni tamani tamaani ingerlaartarput, suliffimminnilu atugassarititaasut isiginiarneqarnissaat eqqartortarlugu, takutillugulu inuit suliffinni nalinginnaalluinnartuni sulisuusut inuiaqatigiinni qitiusumik inissisimanerat, aamma maanni nunatsinni.

Ulloq ingerlaaqatigiiffiusartoq aammalu nalliuttorsiualaarfiusartoq Australiami 1856-imi aallarnerneqarsimavoq, taamanigooq ullormut nalunaaquttap akunnerini arfineq pingasuni sulisalernissaq anguniarneqarluni. Tamannalumi qangalili angoreerparput.
Nuannaarutigaara ullumikkut maani peqatigisinnaagassi, sulimi amerlasuunik sorsuutissaqarpugut, maajillu aallaqqaataa periarfissaalluarpoq malunnartitsivissatut, ataatsimoorlutalu suliassatsinnik anguniakkatsinnillu naammassinninniarnissatsinnut.

Unammilligassaqarpugut: Nunatsinni suliffeqarneq ukiuni makkunani allanngoriartorfiuvoq. Qanga suliffiusartut tammararput, nutaallu allat takkussuullutik, ilaatigut takornariartitsisarnermi aamma aatsitassartiornermi, aammali utoqqarnik sullissinermi kiffartuussivinnilu allani.
Amerlasuut suliffissaminnik amigaateqarput. Imaluunniit aamma piginnaanernik amigaateqartarlutik, suliffissavimmik pissarsisinnaajumallutik. Allat isumassarsiatsialannik peqarput, namminneq suliffeqarfimmik aallartitsinissaminnut, taamaattorli kaammattorneqarnissamik pisariaqartitsisarlutik.
Piginnaaneqarfigissavarput siunissatta takorloorsinnaanissaa, ilutigisaanillu qanga inuunermiit angusat pitsaanerpaat pingaarnerpaallu pigiinnarnissaat: Ataatsimoorneq, qanilaarneq kulturitsinnilu kingornussassiagut imaannaanngitsut, piniarneq aalisarnerlu qitiutillugit, nunatsinnut tamarmut pingaaruteqartuusut isumaqarlutillu. Allannguisinnaassuseqassaagut, angusagullu pitsaanerpaat aalajangiusimassallutigit.
Allannguinerit suulluunniit piuminaattarput, - inuiaallu ikittuinnaapput nunarsuatsinni, uagutsitut kalaallisut, eqaatsumik piumassuseqarnermillu tunngavilimmik ineriartorsinnaasimasut. Kinguaarit ataatsit ingerlaneranni danskit allaffissornikkut ingerlatsineranniit Namminersornermut ikaarsaarsimavugut, sulilu suliassaqarfinnik angerlaassuilluta.

Nutaarsiassaqarpormi nuannersunik, suliffissaaleqineq annikilliartuinnarpoq, tamannalu 2014-imiilli ingerlavoq.
Taamani pissutsit ajornerpaaffimminiinneranni inuit 4300-unit amerlanerusut suliffissarsiortuupput, qaammammili kingullermi kisitsit taanna 3200-nut appariarsimavoq. Sulili amerlapput, amerlavallaarput, kisianni ukiut aappaa qeqqata ingerlanerani 1100-nik ikileriarsimapput! Tamannalu nuannaarutigisinnaavarput!

Isumaqarpunga suliffissanut nittartagaq nutaaq suli.gl aamma ikiortaalluassasoq suli suliffissaaleqisut ikinnerulernissaannut. Suliffissanut nittartagaq sakkussaavoq pingaaruteqartoq nunatsinni pisuussutsitta pingaarnerpaat iluaqutigineqarnissaanni; Tassalu inuit.
Suli.gl-imi suliffissarsiorsinnaavutit. Suli.gl-imi piginnaanitit suliffigisimasannillu misilittakkatit allaaserisinnaavatit, taamalu sulisitsisorilerumaakkannut qaninnerulerlutit, aammami sulisitsisut suli.gl-imi nassaarisinnaavaatsit.

Suli.gl-ip aqqutissiuutissavaa nunatsinni suliffissat najugaqavissunik inuttalerneqartarnissaat. Piffissami matumani suliffissat inuttaqanngitsut 100-ut missaat allagarsiissutigineqarput, sulilu taakkua takusimanngikkukkit taava suli.gl alakkariuk.
Suli.gl tassaaginnarpoq suliniutit ataatsimoortut 16-it ilaat, suliffeqarnermut periusissiatitsinni ”Suliffeqarneq toqqissisimanartoq”. Suliffeqarnerup iluani tamarmiusumi aaqqissuusseqqinneq maanna ingerlapparput, pisortat ingerlatsinerannik eqaannerulersitsisussamik, suliffissarsiortullu pisortani naapittagaanni kiffartuussinermik siunerfilersuiffiusumik pitsaanerulersitsisussamillu.

Suliffissanut, ilitsersuinernut pikkorissaqqinnernullu qitiusumik ingerlatsiviit nutaat suliffissarsiuussisarfiit Piareersarfiillu ataatsimuulersinnerisigut ikiorsiisarnermik nutaanngortitsissapput. Iluaqutaassaaq siunissami ataasiinnarmik saaffissaqalernissaq, suliffeqalerniarnermi ikiorserneqarnissamik pisariaqartitsigaanni. Suliffissamik amigaateqaraanni, aamma ilinniaqqinniaraanni akisussaaffimmik annerusumik tigusisinnaalerumalluni.
Naalakkersuisut suliniut ingerlappaat, siunissami qulakkeerinninnissaq anguniarlugu. Ukiamut inatsimmik, suliffeqarfiit pisortallu suliffeqarfiinit ilinniartunik praktikkertartunillu tigusinissaannut akisussaaffeqarnermut imaqartumik siunnersuuteqassaaq.
Kisianni suliassaq taanna pisortanit oqartussaasunillu taamaallaat kivinneqarsinnaanngilaq. Allannguineq aatsaat iluatsittumik piviusunngorsinnaavoq, kikkut tamarmik peqataappata isumassanillu nutaanik tunniussuippata.

Taamak periaaseqartuaannarsimasugut, soorlu ataatsimoorluta inuiaqatigiinnut ataatsimoortunut sullittartugut.
Ullumikkut sulisartut ataatsimoornerat ataatsimoorluta kivipparpullusooq. Tassalu taannaavoq sulisartut nunarsuatsinni ullorsiortarneranni pineqartoq: Amerlasuujuvugut, ingerlaqqinnissatsinnullu ikioqatigiinnissamut piumassuseqarluta.

Qanortoq ulloq manna nuannersuugili.
Qujanaq!