Lucia Iluartup ullua

Lucia Iluartup ulluani meeqqat santaluciartinneqartarput. Siuttuutinneqakkajuttarporlu meeqqat akornanni angineq/takineq Lucia Iluartoq issuarlugu niaqorutilerlugu siuttoritinneqartarluni. (ass./foto: Johannes Ujo Müller)

 

Juulleriartornerani decembarip 13-ani tassaavoq ulloq Lucia Iluartumut ulloritinneqartartoq. Meeqqeriviit, atuarfeqarfiit suliffeqarfiillumi Santa Luciartitsillutik ullormi tassani aaqqissuussisarput.
Isumaa ulluinnarni inuppassuit eqqarsaatigivallaarneq ajorunarpaat sooq taamatut Santa Luciartoqartarnera. Kinamitaavaana taanna Lucia Iluartoq? Paasissutissat oqaluttuaatitoqqaniittut malillugit imatut oqaluttuarineqartarpoq.

Qaamanermik aqqutissiuisoq

Lucia ukioq 283-imi inuuvoq pigissaartunillu angajoqqaaqarluni. Inuusuttunngorami Romamiut upperisaat upperinagit kristumiunngorpoq kuisillunilu. Naneruutinik qaammaqquteqarluni niaqoruteqarluni inoqutai taartuinnarmi tammartajaartut aqqutissaannik ikiortarsimavai. Taamani inunngorfigisimasaani Sicilienimi kristumiuuneq ulorianartutut inerteqqutaasutullu isigineqarpoq, unioqqutitsisullu naalliutseriarlugit toqumik pillarneqartarsimallutik. Angajoqqaavisa Romamiumut pigissaartumut katinnissaa aaliangersimagaluarpaat, Lucia Iluartulli Guutimut uppernini neriorsuutinilu eqquutsikkumallugit angut katikkumasimanngilaa. Angut oqartussanut tamanna unnerluutigaa, kingornalu aamma kejserimut pilliutigiumannginnera pissutigalugu tigusaalluni.

Tappiitsunut iluartuutitaq

Lucia Iluartoq tigusaammat pillarniarlugu illumut akiliilluni arneriniartarfimmukaanneqarpoq, angutillu Lucia Iluartoq tiguniaraluraangamikku nikisitassaaneq ajorsimavoq. Oqartarput Guutip illersorlugu ikiortaraa. Kingorna naalliutseriarlugu ikuallanniarlugu pillarpaat. Lucia Iluartorli kingumut Guutimit ikiorneqarluni ikuallassinnaasimanngilaat, aallaat nersutip ussiup nikisissinnaasimanagu.
Isini peerlugit paarsisunit naalliutsitaanini aamma nukillaassutiginngilaa. Oqaluttuaq alla malillugu Lucia-p uissaata isai kusagisimavai, Lucia-lli isini peeriarlugit uissaminut tunniuteriarlugit oqarfigisimavaa: "Guuti pillugu inuulanga ". Naggataatigut pinerluttunik toqutassanik toqutsisartumit toqutaavoq. Oqaluttuaq sunaagaluaraangalluunniit isai siaangasumut skål-imulluunniit ikillugit oqaluttuarineqakkajuttarpoq, taannarpiarlu pillugu tappiitsunut
Iluartuutinneqartarluni.

Lucia Iluartoq nunamini Siracusa-mi ilisaavoq, kingornalu allattugaatinut ilanngunneqarluni.

 

lucia iluartoq 950px 02

Sankta Lucia tappiitsunut iluartuutitatut, isit siaangasumut ilillugit, skålimulluunniit ikillugit, imaluunnit soorlu uani avalequtinnguamut ilillugit tigummiartoq nalinginnaasumik qalipanneqartarpoq. (ass./foto: wikipedia.org)

 

lucia iluartoq 660px 03

Sankta Luciap inuuneranit qalipagaq, 1470-ip missaani qalipagaq. (ass./foto: wikipedia.org)