Momo ilumuunngilaq

 

Momo putusaarutitut sanasuata siammarterneqarnissaa anguniarmagu, ilumoortuunnginnera nunarsuarmi paasititsiniutigineqaqattaarpoq.
Momo immaqa tusareerpat, imaluunniit aatsaat tusarpat. Momo challenge-tut taaneqartarpoq, tassa Momo-mut attaveqaraanni attaveqartoq unammilligassanik suliakkerneqartarpoq.
Oqaluttoqartarpoq Momo-gooq meeqqaniit inuusuttuaqqaniillu attavigineqqusaareerluni attavigineqarsimagaangami allattunut allaqattaartartuuvoq, immunullu ajoquseeqqusisartuuvoq soorlu kileqqusilluni imminoqqulluguluunniit imaluunniit ilaquttanik toqutseqqusisarluni. Taamaasiornianngikkaangamillu siorasaarisarsimalluni.

Eqqumiitsuliaannaavoq

Momo assinga takugaanni amiilaarnarsinnaavoq tassami taanna siunertaalluni Tokyo-mi ersinartumik isiginnaagassiamut eqqumiitsuliaavoq takutitassiaq.
Inoqarpoq ersisaarinermik nunannarisalinnik. Assersuutigalugu Momo-mik ilumoorneragaasoqaraangat qassit upperinninnersut paaserusunneqartarluni aamma qanoq siammarterneqartiginersoq paaserusunneqartarluni.
Siullermik Spaniami aallartissimavoq, kingornalu tuluttut nutserneqarsimariarami siammariartuinnavissimalluni. Danmarkimut aamma siammarterneqarsimasoq oqaluttuarineqarpoq, ilaatigullu DR-ip kanaliatigut Ultra-kkut immikkut ittummik nassuiaatigineqarluni saqqummiunneqarpoq, ilumuunnginneranillu uppernarsaarusullutik nassuiaasariaqarsimallutik.

Qeqqata Kommuniata eqqumaffigaa

Maanna Nunatsinni aamma oqallisaalersimasoq, pingaartumik meeqqat akornanni, takuneqarsinnaavoq aamma tusaaneqarsinnaavoq. Ilaatigut maani Sisimiuni atuarfinni meeqqat akornanni ersisaarutiginiarneqartalersimalluni.
Qeqqata Kommunianiit nassuiaatigineqarpoq atuarfiit tamarmik Momo pillugu klasseni tamani eqqartorneqarnissaa piumasarineqarsimavoq. Tassanilu atuartunit tamanit Momo challenge atorneqaqqusaanngitsoq, atuartut kinaassutsiminnik allaasuusaaqqusaanngitsut (falsk profil) kiisalu Momo challengemik nassitsissimagunik atuarfimmut ilinniartitsisuminnullu nalunaarutigineqassasut piumasarineqarsimalluni. Atuarfiit pisortai tamarmik tamanna eqqumaffigalugu nalunaarsimapput.

Momo pillugu siunnersuutit eqqumaffigisassat

  1. Soqutiginngiinnaruk, ilumuunngilaq
  2. Ersisaarneqarsimaguit inersimasumik oqaloqateqarit
  3. Momo pillugu mianersoqqusisaqattaarlutit mobiilikkut siammarterinak, tusagarsornerit asuli siammartiinnassammata

momo 950px 01

challenge DR Ultra-kkut ilumuunngitsuusoq nassuiaatigineqarpoq. Taannamigooruna Tokyo-mi ersinartumik isiginnaagassiorniarnikkut saqqummersitaannaasimasoq.  (ass./foto: DR Ultra)