Inuuteq Storch USA-mi atuakkamik saqqummersitsivoq

Inuuteq Storch-ip atuakkiaa Porcelain Souls. (ass./foto: Inuuteq Storch)

 

Sisimiormioq Inuuteq Storch New Yorkimi atuakkamik saqqummersitsivoq.
Atuagaq saqqummersitaa ateqarpoq Porcelain Souls, asserpassuarnillu 1960-ikkunneersut 1980-ikkunneersullunillu imaqarluni. Assit angajoqqaavisa Agathe Storch-ip aamma Jan Storch-ip assilisarisimavaat, allakkat aamma qangarnisat atuakkami ilaapput.
- Tarnikkut sananeqaatsikkullu oqaluttuaatinnut, kalaallit oqaluttuaannut attuumassuteqarluni, suliniummi annertuumi atuagaq una siulliuvoq. Paasilerpara kalaallit naqitanngorlugu oqaluttuaat nunami allamiunit allanneqarnerusartut, assillu qanga assilisat amerlanersaat nunami allamiunit assilineqartartut, taama Inuuteq Storch nittartakkaminut allappoq.
Inuuteq isumaqarpoq Nunarput pillugu oqaluttuarniarutta nammineq aallaavitsinniit oqaluttuarutta pitsaanerusoq. Taamaattumik ilaquttaminiit, ikinngutiminiit nunaqqatiminiillu assinik katersuisimavoq atuaganngorlugulu saqqummersillugit.
- Atuagaq una assinik naqinnernillu imaqarpoq, taakkulu peqatigiillutik inuunerinik assigiinngitsutigut takutitsillutik. Avatangiisit inuuffigisimasaat, inuttullu atugarisimasaat, Inuuteq allappoq.

 

Isumassarsiortoq

Inuuteq meeraallunili assigiinngitsunik isumassarsiortuusimavoq, paasisaqarusukkaangamilu iternga tikillugu paaserusutani paaserusuttarsimallugu. Inuusuttuaraalluni assiliineq soqutigisarilersimavaa, Taseralimmilu saqqummersitsisimalluni.
Inuuteq Storchip Københavnimi assilisanik eqqumiitsuliornermi ilinniarfimmi Fatamorganami ilinniartitsisuata assilisanik eqqumiitsuliornermi ilinniarfiit nunarsuarmi pitsaanerpaartaanut innersuussimavaa. Inuuteq eqqumiitsuliortut inuusuttut nunani tamalaaneersut 70-it peqatigalugit New Yorkimi International Center of Photography-mi ukioq ataaseq ilinniarami assiliineq, assilisat aallaavigalugit tusagassiorneq aamma assilisanik eqqumiitsuliorneq ilinniarpaa.
Maanna Inuuteq Canadami Montrealimi assinik videonillu inuit nunani allaneersut peqatigalugit saqqummersitsivoq.
Atuagaq Porcelain Souls Kalaallit Nunaanni tuniniaasussanik ujaasivoq.
Atuakkiassaa tulleq New Yorkimiinnermini assilisimasani pillugit decembarimi saqqummersissavaa.

 

Porcelain Souls 950px 02

Atuakkap imarisaaniit. (ass./foto: Inuuteq Storch)

 

Porcelain Souls 950px 03

Inuuteq Storch. (ass./foto: Inuuteq Storch)

 

Porcelain Souls 950px 04

Atuakkami assiinnaanatik aamma allakkat ilaapput. (ass./foto: Inuuteq Storch)