Kiinamiu OL-imut suliniutilik Sisimiuniittoq

Cao Da Fo OL 2022-mut tapersersuisuusup nunarpassuit allat tikikkaangamigit erfalasulerluni assiliseqatigisarpai. (ass./foto: Johannes Ujo Müller)

 

Takornariaq Kiinamiu Sisimiunut aqqusaarnermini Beijing-imi ukiumi 2022-mi OL-ertoqarnissaanut kissaateqarluni ukiorpassuarni suliniutini Sisimiunut nassarpaa.
Kiinamiu 54-inik ukiulik Cao Da Fo nammineq kajumissutsiminik aningaasalikkaminillu maanna nunarpassuit tikittareersimavai, erfalasorlu nassartuartakkani assigiinngitsorpassuarnik atsiorninik stempel-inillu allattuiffigineqartarsimavoq.
Ukiut 15-it Kalaallit Nunaannukarnissani kissaatigiuartarsimallugu maanna tikikkusutani tikippaa.
- Ukiut 15-it Kalaallit Nunaannukarnissara kissaatigisarsimavara, maannalu tikitama nunat 191-issaraat. Nunarsi naatsorsuutigisanniit siuarsimanaarpara. Isumaqarsimavungami aputaannavissuarmi uumasut sumi tamaani angalaarlutik inooqatigigisi. Sunaaffa aqqusineqarlusilu biilerpassuaqarpusi, inuillu inussiarnerluinnarput, tupigusoqisoq Cao Da Fo oqaluttuarpoq.
Tikitami ilaanni kalaallit angerlarsimaffiannut iserami assut Kina-mi angerlarsimaffimminut eqqaanartissimavaa, inuillu naapitani apersortarnerini paasivaa amerlanerit TV aqqutigalugu malinnaavigisarsimagaat, OL-illu erfalasua nassatani takugaangamikku nuannarisaraat.
- Nunarsi naatsumik oqaatigissagukku oqarsinnaavunga imatut: Nunarsi siuarsimaqaaq, oqarpoq Cao Da Fo.

 

Eqqissineq ataqatigiinnerlu

Kissaatigiuarsimavaa Kina-mi Beijing-imi ukiumi OL-eqartoqarnissaa. Neriuutigaalu Kiinamiut amerlasuut ukiukkut timersuutaasartunik soqutiginninnerulissasut.
Cao Da Fo-p sorsunneq akerleriittarnerlu nuannarinngilai, isumaqarlunilu Kinami aaqqissuussinissarsuarmut tapersersuisooqataaginnarani eqqissinermut, ikinngutigiinnermut kulturikkullu paarlaasseqatigiinnermut aqqutissiueqataalluni.
Erfalasoq nassartuartakkani naggataatigut OL-ip qullersaqarfianut Schweiz -imiittumut tunniukkumaarlugu neriorsuivoq.
Cao Da Fo Kina-mi illuuteqarpoq attartortittakkaminik, taakkulu iluaqutigalugit angalanini aningaasalersortarpaa.
Aasap ingerlanerani Qalasersuarmut angalanissani pilersaarutigaa, neriuutigaalu Nunarsuarmi nunarpassuit tikikkumaarlugit.

kiinamiu 950px 01

Cao Da Fo Nunarput qanoq siuarsimatiginera tupigusuutigaa. (ass./foto: Johannes Ujo Müller)

 

kiinamiu 950px 03

Cao Da Fo Afrikap kujasissuani Namibiamiikkami assinga. (ass./foto: thebeijinger.com)