Misileraanermi utoqqaat sukkutorsimasut eqqaamallaqqinnerullutillu isumagissaarnerusimapput. (ass./foto: Johannes Ujo Müller)
Ilisimatuut sukkoq inummut qanoq sunniuttarnersoq misilerarsimavaat, utoqqaat inuusuttullu eqimattanngoriarlugit imeruersaat sukkutalik misilerarnerani utoqqaat inuusuttuniit pitsanngoriaateqarnerullutik angusarissaarnerusimapput.
Tuluit ilisimatuut University of Warwick-imeersut inuusuttut 18-27-nik ukiullit aamma utoqqaat 65-82-inik ukiullit eqimattat marlunngoriarlugit misilerarsimavaat. Eqimattat taakkua imeruersaat glukosemik sukkutalaalik imeruersaatigalugu eqqarsartaatsikkut suliassanik suliaqartissimavaat. Kontrolgruppimiittut placebo-mik sukkuusartalimmik imeruersaateqarput.
Isumagissaarlutik eqqaamallaqqipput
Misiliitereeramikkit qanoq pimoorussitigisimanerat, eqqaamasaat, isumagissaarnerat namminnerlu qanoq tunniussaqarsorisimanerat nalilersorneqarsimapput.
Inuusuttut utoqqaallu imermik sukkutalaalimmik imersimasut kontrolgruppimiittuniit placebo-mik imersimasuniit ingerlalluannginnerusimapput.
Taamaattorli utoqqartaat kisimik ingerlalluarnerusimapput inuusuttortaminniit. Eqqaamallaqqinneruinnaratik isumagissaarnerusimapput allaniit sanilliullugit.
Aap sukkua qaffaallatsilaarneratigut utoqqaat piumassuseqarnerulersartut Ilisimatuut inernilerpaat.
Taamaattorli ilisimatuut utoqqaat kaaginngersut 65-it sinnerlugit ukiullit ingattarsilinnginnissaat mianersoqqussutigaat. Sulimi nerisariaatsinut misissuilluarnissaq pisariaqarmat.
Placebo
Placebo timinnut sunniuteqarneq ajorpoq. Nakorsaatinik ilisimatusarnermi, nakorsaatit sunniutaasa uuttortarneqarnerini placebo sukkunngorlugu, kalkinik iisartaganngorlugu imaluunniit vaseline-nngorlugu atorneqartarpoq.
Aallerfik: Videnskab.dk
Utoqqaat kaaginngersut mianersoqquaat. Sulimi nerisariaatsinut misissuilluarnissaq pisariaqarmat. (ass./foto: Johannes Ujo Müller)
