Sapaatiuppat anaanap ullua

(ass./foto: Johannes Ujo Müller)

 

Ileqquuvoq ukiut tamaasa anaanap ullua malunnartinniarneqartarnera. Ilaqutariit annerusumik minnerusumilluunniit anaanaasup ullormi tassani nukatsilaarnissaanik malunnartitsilaartarnerat.
Ilaasa ullaakkorsiutissaanik piareersaassuttarpaat, naasunik, chokoladenik, pinnersaatinik arlaannilluunniit nuannaarutigisinnaasaannik tunissuteqarfigisarpaat. Immaqa ilai tunissutit pivallaanngikkaluarlugit anaanaq eqqissisimaartinnissaa pingaartittarpaat.
Ukiut tamaasa anaanap ullua allanngorartuuvoq, maajimmi qaammataani sapaatip ullua aappaanni ullorsiutigineqartarmat.

 

USA-mi aallarnerneqarpoq

Anaanap ullua 1872-imi USA-mi aallarnerneqarsimasoq oqaatigineqartarpoq. Aallarniisuusimavoq atuakkiortoq arnallu qinersisinnaanissaannut tamaviaarussisuusimasoq Julia Ward Howe. Siunertaasimagaluarpoq ulloq taanna eqqissinermik malunnartinniarneqartarnissaa. Kingorna ullormut malunnartitsiniarnermut siammarterisuuvoq Anna Jarvis. Siullermik anaanami peqqinnisamut tunngasunik aamma meeqqat toqujaartartut akiorniarlugit suliniuteqarneranut ataqqiniarlugu malunnartitserusussimavoq, minnerunngitsumillu kikkulluunniit anaanaasut suliaat ataqqiumallugit.

Tamanna USA-mi pisortatigoortumik atuuttunngortippaa 1914-imi.