Timersullammaat 2018

Timersullammaat 2018 SAK assammik arsartartui U15 toqqagaapput, ukiuni tallimani suli Nunatsinni pissartaasut. / Årets Idrætspris gik til SAK håndboldpiger U15, der i fem år i træk har været Grønlandsmestre. (ass./foto: Johannes Ujo Müller)

 

Sisimiuni timersornermut tunngasunik assigiinngitsutigut aallussisut Qeqqata Kommunianiit decembarip 28-ani timersortarfimmi nersornaaserneqarput.
Ukioq 2018-imi timersuutini tamani Sisimiormiut angusarissaarsimasut Qeqqata Kommunianiit ujaminnatsinneqarput. Siornatigut kunngit pingasuni ujamminik agguaasarneq pisarsimavoq, maannali sioqqutsinerulluni ukiutoqaq sioqqullugu aaqqissuunneqarpoq.
Ukiut siuliini sanilliullugit ujammit 200-ngajannik ikileriarsimapput, tassa imaappoq timersornermik aallussisut ikiliartuinnarput taamatuttaarlu angusarissaartarneq annikilleriarsimalluni.

Ajunngitsorsititsisalernissaq

Timersornikkut siuarsaanissaq pisariaqartinneqarnera unnussiuaarnermi oqariartuutigineqarpoq. Nammineq kajumissutsiminnik sungiusaallutillu ikiuuttartut nersorniarlugit inersuarmi nikuisinneqarput ersaattaanneqarluarlutillu. Nammineq kajumissutsimik suliaqarneq pilerinarsarniarlugu kommunalbestyrelsi aaliangerpoq sungiusaasunut qiimmassaataasumik kommunimiit ajunngitsorsititsisalernissaq.
- Taakkuummatami meerartatsinnik inuusuttatsinnillu peqqinnartumik nuannaarlutillu inuuneqarnissaannut sullissisugut maligassiuisugullu, oqarpoq borgmesteri.

Unnussiuaarnermi Sisimiuni timersoqatigiiffiit immikkut nerrivilersorneqarput imeruersaatinillu sassaalliisoqarluni.

Sisimiuni Kalattoortartut pisarnermisut nuannarineqarluartumik takutitsipput, Nukannguaq Kajussen erinnanik atuilluni akunniliisarpoq, taamatuttaarlu erinarsoqatigiit Malik appittarlutik.

Timersullammaat 2018

SAK assammik arsartartui niviarsiaqqat U15 timersullammattut toqqagaapput. Timersullammaat toqqarneqartut tunniusimallutik pimoorussilluartuupput, pissartanngortarnerannullu nunaqqataasunut tulluusimaartitsisuullutik. Ukiut arfineq pingasut imaluunniit qulit ingerlaneranni ataqatigiilluinnarlutik timersoqatigiiupput, sungiusariarnissaminnillu aamma peqqinnartumik inooriaaseqarnissaminnik pingaartsitsilluinnartuullutik. Illoqarfitsinni ilutiminnik sukasaatissaminnik unammisassaqannginnertik pissutigalugu namminneq katersaminnik Nunarput qimallugu unammiartarneranni angusarissaarluartarput. Soorlu Svane Cup-imi peqataasut 66-ini pitsaanerpaat sisamaattut inissisimallutik. Novembarimi Nuummi unammisaqattaarnermi nukarlersaagaluarlutik pissartanngorput. Ukiut arfineq marluk kingulliit finalertuaannarput, kingulliillu tallimat tulleriit suli pissartaallutik.

Siulersuisuullammaat 2018

SSP ujakkaartartut timersoqatigiiffimmik ingerlatsilluarnerpaatut aamma siulersuisuullammattut toqqarneqarput. Ukiorpaalunngortuni Sisimiuni pikialaartitsinernut assigiinngitsunut aaqqissuusseqataallutik malunnaateqarluartuupput. Soorlu aamma tusaamaneqarluartoq Arctic Circle Race-qartoqarnerata saniatigut meeqqanut Miki Arctic Circle Race aaqqissuuttarpaat, arfininngornerillu tamarluinnaasa unammisitsinerit il.il.

Piukkunnaatillit 2018

Sisimiut Taekwon-Do klub, meerartaat piukkunnaatilittut toqqagaapput. Toqqagaasut illoqarfitsinni minnerunngitsumillu Nunarput tamakkerlugu unammersuaarnerni malunnaateqartumik saqqumisalereersimapput. Unammiartornermi timersortartorpalaartumik pissuseqarneq ataqqinninnerillu takutittuaannarpaat, saniatigullu ikinngutaalluartuunissaq pingaartittarpaat. Guldit 13-it, sølvit 12-it bronzellu marluk pissarsiarisimavaat. Angusarissaarnerpaallutik pokali ingerlaartoq Sisimiunut angerlaappaat.

Sungiusaasuullammaat 2018

SAK U13 isikkamik arsartartunut sungiusaasuullammattut toqqagaapput Hans Ole Kristiansen aamma Jens Karlsen. Sungiusaasut taakkua pimoorussilluartuupput sungiusakkaminnillu siuariartornissaannik pingaartitsisuullutik. Naligiittut peqatigiittullu sungiusagaat misigitinnissaat sulissutigisaasa ilagivaat. Sungiusaasut suliarisarpaat sungiusannginnermi, sungiusarnerup nalaani aamma sungiusareernerup kingorna meeqqap qanoq alloriarsimatiginera malinnaaviginissaa. Sungiusagaat weekendini ullaaralaakkut makiaarsimallutik qilanaaqalutik sungiusariarnissaminnut ornigutsittarpaat.

 

timersullammaat 2018 950px 02

Piukkunnaatillit 2018 Sisimiut Taekwon-Do klub meerartai toqqagaapput, angusarissaarsimaqalutik pokali ingerlaartoq Sisimiunut angerlaassimavaat. / Lovende Idrætsudøvere 2018 gik til Sisimiut Taekwon-Do klub, børn, der på grund af deres gode resultater har taget vandrepokalen med hjem til Sisimiut. (ass./foto: Johannes Ujo Müller)

timersullammaat 2018 950px 03

Siulersuisuullammaat 2018 SSP ujakkaartartui toqqagaapput, timersornikkut pikialaartitsinernullu aalajaallutik aallussilluartuunerat nersorneqarnerannut ilaatigut pissutaapput. / Årets Bestyrelse 2018 gik til SSP Langrend på grund af deres utrættelige indsats indenfor sporten og arrangementer. (ass./foto: Johannes Ujo Müller)

 

timersullammaat 2018 950px 04

Sungiusaasuullammaat 2018 Hans Ole Kristiansen aamma Jens Karlsen SAK U13 arsartartuinut tunniusimallutik sungiusaasuulluartuunerat nersornaasissutigivaat. / Årets Trænere 2018 gik til Hans Ole Kristiansen og Jens Karlsen på grund af deres store og utrættelige arbejde med at træne SAK U13 fodbold. (ass./foto: Johannes Ujo Müller)