Atuartut kajumissaaserneqartut

Saamerlerniit Borgmesteri Malik Berthelsen, Maligassiuisoq Uiloq S. Dahl, Maligassiuisoq Emilie M. Damgaard, Siuariaatilik Naja-Arnaq F. Absalonsen kiisalu Anuni-miit Severina Enoksen. (ass./foto: Nalunnguarfiup Atuarfia)

 

Nalunnguarfiup atuarfiani atuartut sisamat pingasunngormat kingullermik kajumissaaserneqarput. Ukiup naalernerani kajumissaaserneqartut ilinniartitsisuniit atuarnerup aallartinnerani maluginiarneqarsimasut atuarfiup inersuaani atuartorpassuit peqatigalugit persuarsiutigineqarput. Kajumissaasiineq atuartunit, angajoqqaanit ilinniartitsisuniillu qiimmallatsitseqaluni nuannaarutaalluarpoq.

- Una kajumissaasiineq taamaanga killeqanngilaq, maajimilu ingerlateqqinneqassalluni. Suliniut taamaattoq atisaarniarfik Anuni-p tapersersorlugu, Sisimiuni suliffeqarfinni kisiartaalluni, Nalunnguarfiup atuarfiani akullerni atuartunik kajumissaasiisarnissaq aallartippaat, oqarpoq N.A.-mi akullerni aqutsisoq Najannguaq I. Enoksen.

Kajumissaasiinermi peqataapput Qeqqata Kommuniani borgmesteri Malik Berthelsen, Anunimiit Severina Enoksen, angajoqqaat, ilaquttat, ilinniartitsisut atuartullu.

Atuartoq siuariaatilik

Naja-Arnaq F. Absalonsen 4.D. atuarfimmi siuariaatilittut nersorneqarpoq. Atuarfiup imatut oqaasertalerpaa: Naja-Arnap eqqarsaatai atuarfimmiinnerulerput, atuarnissaminut piareersimanerulerpoq kiisalu nukissaqarnerulerluni.

Atuartoq maligassiuisoq

Emilie M. Damgaard 4.E. atuarfimmi maligassiuisutut nersorneqarpoq. Atuarfiup imatut oqaasertalerpaa: Emilie atuartuuvoq piffissamik paarsilluartoq. Ullaakkut anitsiarfinnilu inortuinani takkuttuartuuvoq, tiiminillu ingerlanerini piffissaq atorluarlugu suliaqartartuulluni.

Atuartoq maligassiuisoq

Uiloq S. Dahl 5.D. atuarfimmi maligassiuisutut nersorneqarpoq. Atuarfiup imatut oqaasertalerpaa: Uiloq piareersimalluni atuariartortarpoq. Atuarfimmi sakkussat pigineqartussat tamaasa piginissai pingaartitarivaa ilinniakkeriuarnissanilu pingaartitaralugu.

Atuartutsialak

Dorthe Olsen 5.E. atuarfimmi atuartutsialattut nersorneqarpoq. Atuarfiup imatut oqaasertalerpaa: Dorthe atuaqatiminik kaammattuisuuvoq tamanik peqatiginnittoq. Atuarfiup malittarisassaanut malinnilluartuulluni atuarnermullu pingaartitsisuulluni.

Kajumissaaserneqartut diplomimik Anuni-miillu poortukkamik tunineqarput.

Kajumissaasiinerup isumaa

Qeqqata Kommuniani kommunalbestyrelsip anguniakkani malillugu kajumissaasiisarnerup isumaa tassaatippaa atuartut tassaalissasut atuarfimmi ataqqinnittuunerat, piffissaq eqqorlugu atuariartortartuunerat kiisalu ilinniartitsisut piumasaqaataanut malinnittuunerat pillugu Nunatsinni nuannersumik tusaamasaalernissaat.

 

atuartutsialaat NA 950px 02

Akullerni atuartut, angajoqqaa ilinniartitsisullu. (ass./foto: Nalunnguarfiup Atuarfia)

 

atuartutsialaat NA 950px 03

Akullerni atuartut Aulami peqataasut. (ass./foto: Nalunnguarfiup Atuarfia)