Napoli nuanneq kisianni Sisimiuniit tukanneruvoq

Novembarimi Italia isugutappoq siallertarlunilu. (ass./foto: Hans Frederik Olsen)

 

Sisimiormiut utoqqaat Italiamut angalasimasut nuannisarluarsimallutik angerlamut apuutereersimalersut nuannersumik misigisaqarput, aammali tupaallaatigilaakkaminnik tukanaarsipput.
Utoqqaat Sisimiormiut 16-it Italiap illoqarfiata ilaannut Napoli-mut novembarip naajartornerani angalapput.
- Italiamiinnerput nuannerluinnaqqeqqissaarpoq, maani kaperlalernerata nalaani inuuneq allanngulaarlugu. Silaa soorunami isugutalluni siallersuaartarpoq, kisianni ajoqutaanngilaq. Illoqarfik Napoli nuanneraluarluni aappaatigut ipeq, eqqagassarpaaluit sumi tamaani aqqusinerni takussaapput. Sisimiuniit tukanneroqaaq, angalaqataasoq Elisabeth Lyberth oqaluttuarpoq.

Grazie - Kangaatsiaq

Italiarmiut inussiarnernerarpaat, pingaartumik neriniartarfimmut ornittakkaminni inuit nuannernerarpaat.
- Qallunaaniit inussiarnernerujussuupput, 1-2-3 ilikkaramitigut tassa takuinnassanngilaatigut suaartarluta aalaterillutalu tassa pisarpaatigut, Elisabeth Lyberth oqaluttuarpoq.
Italiamiutut oqaluttuusaarnersuaq aliikkutarisimavaat, qujaniaraangamillu italiarmiut qujasarnerat ‘grazie’ eqqaamaniarsarisarsimavaat.
- Uagut Italiarmiutut oqaluttuusaarnersuaq tassa atoqattaarparput. Uanga Italiarmiusut qujaneq puigoqattaartariarakku eqqaamaniassagakku oqaqattaartarpunga Kangaatsiaq, illarluni Elisabeth oqarpoq.

Kalaallit Nunaanni Qeqqata Kommunia maannakkut kisiartaalluni utoqqarnik nunanut allanut angalatitsinissamik periarfissiisarpoq. Angalanissamut najugaqarfissamullu kommuni aningaasanik aalajangersimasumik annertussusilikkamik immikkoortitsisarpoq, tassani aningaasartuutissat sinnerinut utoqqaat namminneq akiliuteqartarlutik. Utoqqaat malinnaasinnaanissaat anguniarlugu, sapinngisamik sipaaruteqarfissarsiortoqartarpoq.

Siusissukkut ileqqaagaqarnissaq pisariaqarpoq

Peqataasoq ilaat isumaqarpoq taamatut utoqqarnut angalitsisarneq pitsaasuusoq. Taamaallaat kaammattuutigerusunneqarpoq siusissukkut peqataasussanik aaliangiisarnissaq, taamaasilluni peqataasussat siusinaarlutik angalanissamut ileqqaagaqartarniassammata. Kingullermik piffissaq sivikitsup iluani akiliisussanngorsimanertik peqataasussaagaluit ilaannut akissatigut akunnattoorfigisimanissaat ilimagineqarpoq, peqataasinnaajunnaarlutimmi nalunaartut arlaqarsimammata.

- Angalatitsisuusugut angalasullu siusinnerusukkut Italiamiinnikuusimanngilagut, taamaalillunilu illoqarfimmi angalaarnermut, takusassanut, pisiniarfinnut tuniniaavinnullu alakkarterinermut ullut atorneqarput. Takornarianik angallassisulerluta bussinik angalaarpugut, taamaalillutalu Napoli kiisalu Italiamiut kulturiannik annertuumik takusaqarluta, Qeqqata Kommuniani Utoqqarnut immikkoortortaqarfimmi immikkoortortami aqutsisoq Søren Alaufesen oqaluttuarpoq nangillunilu:

-Innermik anitsisartutoqaq Vesuvio alakkartertussaagaluaratsigu, ajoraluartumilli matoqqasimavoq. Taamaakkaluartorli utoqqaat misigisaqartupilussuupput, arlallillu nuannisaarsimanerarlutik utertiffigivaatigut, naggasiivoq.

Utoqqaat Sisimiuneersut kisimik angalanikuusimanngillat. Maniitsumiillu utoqqaat kiisalu nunaqarfinniit ataasiakkaat, Sisimiuni utoqqaat angalanissaat sioqqutilaarlugu, Mallorca-mut angalaarput.
Ukiup tullissaanut Kommunalbestyrelsi siunertamut aningaasanik ammaarluni immikkoortitsivoq.

 

napolimut angalaneq 950px 02

Sisimiormiut Napoli-mi. (ass./foto: Hans Frederik Olsen)

 

napolimut angalaneq 950px 03

Sissap tungaanut pisuttuarlutik aqqusaagaasa ilaat. (ass./foto: Hans Frederik Olsen)

 

napolimut angalaneq 950px 04

Neriniartarfik ornittagaanni assiliseqatigiittut, kammattaatik sulisut peqatigalugit. (ass./foto: Hans Frederik Olsen)

 

napolimut angalaneq 950px 05

Tysklandimi qimutsuitsorlutillu busserput. (ass./foto: Hans Frederik Olsen)

 

napolimut angalaneq 950px 06

Angalaqataasut ilaat mittarfimmiitillutik tamusseqqaarput. (ass./foto: Hans Frederik Olsen)

 

napolimut angalaneq 950px 07

Qaqqarsuaq Vesuvio innermik anitsisartoq. (ass./foto: Hans Frederik Olsen)

 

napolimut angalaneq 950px 08

Ulloq kingulleq neriniartarfimmi nereqatigiittut. (ass./foto: Hans Frederik Olsen)

 

napolimut angalaneq 950px 09

(ass./foto: Hans Frederik Olsen)

 

napolimut angalaneq 950px 10

(ass./foto: Hans Frederik Olsen)

 

napolimut angalaneq 950px 11

Illoqafimminnut Sisimiunut tikiinnaqaat. (ass./foto: Hans Frederik Olsen)