Sisimiuni Kangerlussuarmilu qimmit akusaasinnaaneri pasilliutigineqarput

Anngunniuffik Qeqqa-ni qimmiutillit Avannaata Qimussersuanut mattussaagallaqqapput, akusanik qimmeqartoqaratarsinnaanera pissutigalugu. (ass./foto: Johannes Ujo Müller)

 

Sisimiuni Kangerlussuarmilu qimmit kalaallit qimmerinngisaannik akusaasinnaaneri pasilliutigineqarnerisa kingorna Sisimiormiut, Kangerlussuarmiut, Sarfannguarmiut Itillermiullu Avannaata Qimussersuanut peqataasinnaajunnaarallarput.

Qimminik akusanik qimmeqarniarneq pillugu peqatigiiffimmiit Qimusseq Sisimiuniit akueriuminaatsinneqarpoq, neriuutigineqarlunili tamanna pasilliutaannaammat akusaanatillu ilumuunngitsuusut.
- Qimmit akusaanerinut pasilliisoqarluni nassuiaasoqarlunilu e-malikkut nassinneqaratta ingerlaannaq qisuariarsimavunga, mattussaanerpullu pillugu siulersuisooqatikkalu ataatsimiissimalluta. Kalaallit qimmiinut illersuisuulluni tamanna pisoq ilumuussappat akueriuminaappoq. Peqatigiiffik tamakkiisumik illersuivoq kalaallit qimmiisa akusaannginnissaat, oqarpoq Qimmeq Sisimiuni siulittaasoq Severine Inûsugtok’.
Siulittaasup neriuutigaa Avannaata Qimussersuanut ammaanneqaqqissallutik, ukua pineqartut pasilliutaannaammata.
Aappaagu Sisimiuni sukkaniutsitsinissat pilersaarutaasut allanngunngillat ullulerneqareersimallutillu. Pasillerneqartulli akusanik qimmeqassagaluarpata peqatigiiffimmut mattussaanermik kinguneqartinneqartariaqartut isumaqarfigineqarpoq.
- Qimmeqarneq pillugu inatsisitigut tamatta tunngavissaqarpugut, kommunip maleruaqqusai Namminersorlutillu oqartussat maleruaqqusaanni inatsisaanni taama inissisimatitaavoq. Akusanik qimmiutillit peqataasinnaanerannut killeqalissapput, taavalu taamaattoqassappat qimmit pineqartut toqunneqartussaapput. Inatsit malillugu taamak isikkoqarpoq. Inatsimmi avaqqussinnaannginnatsigu, Severine Inûsugtok’ nassuiaavoq.
Kikkulluunniit kalaallit qimmiinik tasikumiartakkanik, qimuttunik, piniutinik, sukkaniutinik sukisaarsaatinilluunniit qimmillit peqatigiiffimmut Qimmeq Sisimiuni ilaasortaanissaannut tikilluaqqusaasut siulittaasup Severine Inûsugtup erseqqissaatigaa.
Ullumikkut Qimmeq Sisimiut 180-it tungaanut ilaasortaqarpoq.

 

Qeqqata Kommunia akuleruttariaqarpoq

KNQK-mi siulittaasoq Mikkel Jeremiassen siulersuisooqatinilu Sisimiunukarusukkaluarlutik angalanermut aningaasartuutinut akissaqanngikkallarnertik aporfigalugu suli ulluliinngillat, novembarimili apuukkusukkaluarput. Suliaq oqimaammat tamanna aningaasartuutiginissaanut sillimaffigisimanngilaat.
- Qeqqata Kommunia aggersaalluni akulerussinnaasariaqarpoq. Taamaammat aamma Qeqqata Kommuniani borgmesteri sisamanngormat tallimanngormallu pissarsiareriartaraluarakku kommunalbestyrelsi ataatsimiippalummat ulapaarpalukkami pissarsiarinngitsoorpara, oqarpoq. Mikkel Jeremiassen.
Taamaattoq sapinngisartik tamaat allatigut aqqutissiuiniarsaripput, aammalu sukkulluunniit kattuffik kinguarsaassanngitsoq eqqaallugu.
- Siullermilli una ersarissaatigissavara kattuffittut aaqqissuussaanitsinni inuit ataasiakkaanut pasilliinernut tunngasunik suliaqarneq ajorpugut, kisianni allakkatigut anngussiffigineqarsimavugut, soorlu Qeqertarsuarmi taamatut pisoqarsimasoq, tunngavimmikkullu suliassat assigiittorujussuupput. Inatsisit Nuna tamakkerlugu qitiusoqarfimmiipput Nuummi, taakkulu susinnaanngilagut. Kisianni uagut qimussimik sukkaniunnerit aaqqissuuttakkagut Kattuffiup ataaniipput. Sinerissamilu qimmit qimuttut akuneqannginnissaat qulakkiissagutsigu allatut ajornartumik nuanniikkaluartoq taamatut mattussisariaqarsimalluta, oqarpoq Kalaallit Nunaanni Qimussertartut Kattuffianni siulittaasoq Mikkel Jeremiassen.
Siulittaasup oqaatigerusunngilaa kalaallit qimmiat akusaannginnera navianartorsiortoq, tassami suli nalunarmat ilumut qimmit allanit akusaanersut. Kisianni atuutsitsiniarnerminni kalaallit qimmiinik qimmiutillit tamarmik eqqummaarinnerusariaqartut sianigisassallu tappiffiginerussagaat siulittaasup isumaqarfigaa.

 

Qaammarsaaneq pisariaqarpoq

Inatsisartut kulturikkut ataatsimiititaliaat sapaatip akunnerata siuliani ataatsimeeqatigisussaasimagaluarpaat, teknikkikkulli ajornartorsiuteqarnertik pissutigalugu novembarip tallimaani kinguartinneqarpoq.
- Uagut Kattuffittut paasititsiniaanernik qaammarsaanernillu immikkut pisussaaffigalugu inatsisitigut suliakkerneqarnissarput anguniarparput. Soorunami aappaatigut tupinnanngilaq immaqa inuusuttunnguit taamatut ittumik inatsiseqarnerat nalusimasinnaavaat, ullumikkummi taassumap tungaatigut takussaasoqanngimmat. Inatsimmi ima oqarpoq, Itillimiit avannamut Siorapalummut qimminik allanik qimuttuunngitsunik eqqusseqqusaanngitsoq. Tamakku inatsisit takussaannginnamik, tassa taamaammat ersarissagassaqarpugut taanna ersarissupilussuuvoq, oqarpoq KNQK-p siulittaasua Mikkel Jeremiassen.

Mikkel Jeremiassenip neriuutigaa Avannaata Qimussersuaqarnissaa qallivallaartinnagu aaliangiisoqarumaartoq.
Kalaalllit Nunaat tamakkerlugu qimmit katillugit 2017-imi 15.629-upput. Sisimiuni 899-it, Kangerlussuarmi 57-it, Itillimi 21-it kiisalu Sarfannguani 21-t.

 

qimussinik sukkaniunneq 950px 02

Qimmeq Sisimiuni siulittaasup Severine Inûsugtup neriuutigaa qimminik akusanik pasilliutigineqartut ilumuunngitsut. Ilumuussappalli akusanik qimmeqarneq akuerinaviarnagu. (ass./foto: Johannes Ujo Müller)