Taseralimmi tusarnaartitsineq attortiffiusoq

(ass./foto: Johannes Ujo Müller)

 

Sapaatiummat Taseralimmi Ida Heinrich aamma Kuunu Berthelsen misigissutsikkut attortiffiusumik tusarnaartitsipput.
Taseraliup inersuaa inunnik ulikkaavillugu tusarnaariartoqarpoq. Nunatsinni erinarsortartut tusaamaneqarluartut taakkua marluk peqatigalugulu pattattartoq Søren Johannsen erinnat assigiinngitsut nuannarineqarluartut atorpaat.
Ida Heinrich aamma Kuunu Berthelsen CD-mik DVD-millu novembarimi saqqummersitassaminni erinnat erinarsorpaat. Tusarnaartitsinerup ingerlanerani Ida Heinrich inersuarmiit qasuersaariartorluni anigallartarpoq, utaqqiisaalu Kuunu kisimi erinarsortarpoq taamatuttaarlu pattattuat akunniliisarluni.
Idap tupaallaatigisaanik Kuunup ikinngummi Idap erinaq nuannarilluagaa napparsimalernerminilu nukittorsaatigisarsimasaa Jens Karl Brobergip sanaava ’Aqqutissaq nalunartoq’ erinarsorpaa. Aatsaavissuaq marluullutik taamatut tusarnaartitsinertik atatillugu Kuunup Idamut tunissutigaa, tamannalu Idap attortissutigaa, Kuunullu naammagu qutsavigalugu.

 

Inuk tupinnartuliaq

Taseraliup pisortaa Arnajaraq Støvlbækip tikilluaqqusinermini assut nuannaarutigaa tulluusimaarutigalugulu Ida Heinrich, Kuunu Berthelsen aamma Søren Johannsen Sisimiuni tusarnaariartortitsisinnaasimammata. Eqqaavaa taamani Taseralik ammarnersiorneqarmat Ida Heinrich aamma Josef Lund Josefsen peqatigalugu tusarnaartitseqqaarmata. Maanna ukiut qulit qaangiuttut Taseralik nalliuttorsiornerani tusarnaartitseqqissinnaasimammat qutsavigaa.
- Immaqa maaniittugut tamatta Idap aqqusaagai nalunngilagut. Aamma nalunngilarput inuk qanoq tupinnartuliaatigisoq. Ammasumik pissuseqarnerata ilukkut sunnerpaatigut, allaammi inoqammut asanninnermik tunniussinissatsinnut suli annertunerusumik eqqaasilluta, oqarpoq Arnajaraq Støvlbæk.

 

Nukittuallanneq

2016-imi Ida Heinrichip kræftimik nappaateqalernini paasiva, timaanullu maanna katsorsarneqarsinnaanngitsumik siaruaassimalluni. Sisimiunut tusarnaartitsiartornissani qularileraluarsimavaa qaammatini ukunani angerlarsimaannalerluni, innangaannalerluni killissani utaqqiinnalerlugulu peruluttarsimanermik.
- Tupinnaannartumingaasit qamuuna qaamaninnguaq takoriarakku, aaliangerpunga: Naamik, uanga nuannarisara anersaaqarfiga erinarsorneq aallaavigalugu imminut peqqissariartorniarpunga. Nukissatseqqinniarpunga, nalunngilara pinngortitsisutta taassuminnga aqqutissiuutissagaanga, Ida Heinrich pisimasumik oqaluttuarpoq.

Sapaatip akunnera matuma siorna nukittuallassimasutut misigisimavoq, nakorsaminiillu angalanissaminut ajoqineqanngeriarami ilaquttaminiillu kaammattorneqariarami Sisimiunut tusarnaartitsiartornissani aaliangeriasaarsimallugu.
- Kikkulluunniit napparsimalersimagutta suguttaluunniit imminut upperisarta. Asannineq sumiluunniit nukittoqqutigalugu. Taanna tamanit nakorsaatit pitsaanerpaavoq. Uummatinnit asavassi tamassi ilumoorpunga, Ida Heinrich tusarnaartitsinermi naggasiinermini ilaatigut taama oqarpoq.
Tusarnaartitsineq naammassimmat tusarnaariarsimasut Ida Heinrich aamma Kuunu Berthelsen qutsavigalugit aniartornerminni aqqusaaqqaarpaat. Tamannali sivikitsumik ingerlanneqarpoq Ida tusarnaartitsinermini nukippassuit atorsimammagit qasuersaariartortariaqalermat.

 

ida kuunu 950px 02

Ida Heinrich-ip Taseralimmi suliassani naammasserusutani sapaatiummat naammassivaa. / Ida Heinrich fuldførte sin opgave i Taseralik i søndags, som hun inderligt ønskedes at fuldføre. (ass./foto: Johannes Ujo Müller)

 

ida kuunu 950px 03

Kuunu Berthelsenip Ida Heinrich peqatigalugu tusarnaartitseqqaarnerminni tunissutitut erinaq Idap attortiffigaa. / Ida blev rørt over sangen, som Kuunu Berthelsen sang for hende i forbindelse med deres første koncert. (ass./foto: Johannes Ujo Müller)

 

ida kuunu 950px 04

Taseralik ulikkaavillugu tusarnaarianit attortiffioqisumik tusarnaariartoqarpoq. / Salen var fyldt helt op til det rørende koncerten. (ass./foto: Johannes Ujo Müller)

 

ida kuunu 950px 05

Arnajaraq Støvlbækip tusarnaartitsisut tulluusimaarutigalugit Taseralimmut tikilluaqquai. / Arnajaraq Støvlbæk bød stolt solisterne velkommen til Taseralik. (ass./foto: Johannes Ujo Müller)