Tupersuaq atoqqaartinneqarpoq

Ukioq manna tupersuup nutaap atoqqaartinneqarnissaa misilinneqarnissaalu pingaartinneqarsimavoq. (ass./foto: Lars Ingemann Larsen)

 

Ukiut tamaasa taamaalinerani aaqqissuunneqartartoq byfest arfininngormat aaqqissuunneqartoq siuliiniit sammisassakinnerugaluartoq tupersuaq misilinneqarluni atoqqaartinneqarpoq.
Sila seqinnarikkaluarluni inuit ilai oqorsalaarsimallutik aaqqissuussinermut peqataapput. Ukioq manna meeqqat pinnguaataat amerlagisassaanngillat, taamaattorli meeqqat nuannarilluagaat pullattagarsuaq sisoorfiusartoq pississaajutigalutik sisooqattaarfigaat.
Nalunnguarfiup eqqaani inuit namminneq tuniniakkaminnik assigiinngitsunik tuniniaapput.
- Imatut niivertut peqatigiiffiillu aaqqissuussinermut amerlavallaanngikkaluartut, tupersuup misilittarneqarnissaa pinerullugu taamatut aaqqissuussilaarnikuuvugut, oqarpoq namminneq piumassutsimik suleqataasut ilaat Jens Klaus Lennert.
Lions Club-ip meeqqanut pinnguaatit assigiinngitsut pigisai meeqqat ulluannut atortagaat atorneqarsinnaasimanngillat, byfestimut inuttalersuinissaq nukissaqarfiginiarneqarnera aporfiusalersimanera oqaatigineqarmat.
- Soorunami maqaasinarput taamaattut. Kisianni una tupersuup misilinnissaa massakkut pingaartinnerullugu siunissamullu eqqarsarluni qanoq iliortoqarsinnaanersoq isumaliuutigineqarpoq. Soorlu aasaanerusukkut aaqqissuussisalissanerluta, immaqalu ulloq ataasiinnaatinnagu nunap timaaniissinnaaneq eqqarsaatersuutigineqarluni, Jens Klaus Lennert nassuiaavoq.

 

Tupersuarmi nipilersorluarput

Arfininngornerup unnukkuani tupersuarmi Sisimiormiut nipilersortartut ataasiakkaat appisimaaqqaarsimapput, kingornalu Îsâvaraq Petrussen Aalut-kkunni siuttuusoq appisimaarpoq, naggasiisuullunilu ernera Inuk, Inunnguaq Petrussen. Inunnguaq Petrussenip saqqummersitai nutaat pisoqqallu appisimaarpai.
- Takusinnaasagut malillugit tupersuarmi taamatut nipilersortoqarnera torraasorujussuuvoq, periarfissanimmi ulikkaarpoq. Aammami angigami nipilersorfittut aliikkusersuiffissatut atorneqarluarsinnaalluni, Jens Klaus Lennert naggasiivoq.
Aasap ingerlanerani suleqatigiissitamik pilersitsisoqarmat imatut inuttalersuisoqarpoq: Jens Klaus Lennert, Nukannguaq Kajussen, Markus E. Olsen, Rene Ingemann, Karl Olsen, Frederik Kreutzmann, Malik Berthelsen. Taakkulu ukiap ingerlanerani Sisimiut Festival Komitép pilersinneqarnissaanut siunnersuusiortussaapput.

 

tupersuaq atoqqaartinneqarpoq 950px 02

Meeqqanut sammisassat siornatigorniit ikinnerugaluartut sisoortarfik pullattagaq atorneqarpoq. (ass./foto: Lars Ingemann Larsen)

 

tupersuaq atoqqaartinneqarpoq 950px 03

Inuit piumasut Nalunnguarfiup eqqaani assigiinngitsunik tuniniagaqarput. (ass./foto: Lars Ingemann Larsen)

 

tupersuaq atoqqaartinneqarpoq 950px 04

(ass./foto: Lars Ingemann Larsen)