Sisimiut ilinniartoqarfissuartut annertuseriaqqilerpoq

KTI Sisimiut ilinniarfiusinnaasunik assigiinngitsunik pilersaaruteqarluarpoq. (ass./foto: Johannes Ujo Müller)

 

Sisimiut ilinniartoqarfissuartut taaneqartalereeraluartoq suli annertuseriaqqilerpoq. KTI-mi, Kalaallit Nunaanni Teknikimik Ilinniarfik, ilinniarfissat amerleriaqqilerpai, aappaagumi aallartilermat DTU suleqatigalugu aalisarnermut teknolog (fiskeriteknolog). 2020-mi issittumi pissutsinik aatsitassalerinermullu sammisaqarfiulluni maskinmesterinngorniarneq aallartissaaq, ukiorlu taanna ilinniarfissat nutaat marluk ukiuni marlunnik sivisussuseqartussat aallartissallutik. Suliniutigineqarportaaq aatsitassalerinermut masterinngorniarneq, siunissamilu neqeroorutigerusunneqarpoq Nunatsinni amigaatigineqartartoq bygningskonstruktøri.
- Tusaasinnaasassitut siunissarput qaamavoq, inuusuttavut Nunatsinni pingaartumik Sisimiuni ilinniakkaminnik ingerlariaqqinniissaat eqqarsaatigalugu, KTI-mi pisortap tullersortaa Finn Ommestrup ilinniarnertuut naammassimmata oqalugiaammini taama oqarpoq.
Oqaatigineqarportaaq ilinnialerumaartussat ilinniakkanik pissanganartunik KTI-mi qilanaarutissaqartut.
KTI-p kissaatigaa siunissami Teknikimik Ilisimatusarfik aallartikkumaartoq.

 

KTI allilerneqassaaq

Ukiortaamiit suleqatigiissitaq pilersinneqartoq septembarip qaammataani naatsorsuutigineqarpoq nalunaarummik tunniussiumaartoq.
- Ullutsinnilumi aatsitassarsiornikkut annertuunik ingerlatsisoqalernissaanut aningaasaliissutinik annikinngitsunik atuisoqalereerpoq, aatsitassanik assigiinngitsunik iluaquteqalersinnaanermi, soorlu guld-imik, saviminissamik aamma uuliamik. Misissuinerit taakkua ersersippaat immikkut pisariaqartitsisoqartoq teknikkimut tunngasutigut sullinneqarnissamik. Siunissami ineriartornissami naatsorsuutigineqarpoq annertuumik pisariaqartitsisoqalissasoq sulisunik ilisimatusarnikkut assigiinngiiaartunik aammalu ilisimasanik tigussaasuni suliani atorneqarsinnaasunik, maskinmesterini ilisarnaataasunik, ilinniartitaanermut pilersaarummi allassimavoq, maskinmesterinik pisariaqartitsineq silaannaap pissusiinut tunngasunik suliani aamma avatangiisinut tunngasunik suliani annertusiartussasut, Ilinniartitaanermut Naalakkersuisoqarfiup “Ilinniartitaanermut Pilersaarut II” saqqummiussaani ilaatigut allassimavoq.
Københavnimi maskinmesterskole suleqatigalugu ilinniarfiup Sisimiuniinnissaa anguniagaavoq.
KTI Sisimiut allilerneqarnissaa Ilinniartitaanermut Naalakkersuisoqarfiup ilimagaa.

 

Sisimiut ilinniartoqarsiffuaq 950px 02

KTI-mi pisortap tullersortaa Finn Ommestrup: Tusaasinnaasassitut siunissarput qaamavoq, inuusuttavut Nunatsinni pingaartumik Sisimiuni ilinniakkaminnik ingerlariaqqinniissaat eqqarsaatigalugu. (ass./foto: Johannes Ujo Müller)

 

Sisimiut ilinniartoqarsiffuaq 950px 03

(ass./foto: Johannes Ujo Müller)