Qimmit assiliissutikkut nakkutigilertigit

Sisimiuni qimmeqarfik nunap timaa tungaani inissisimavoq.  (ass./foto: Johannes Ujo Müller)

 

Sisimiuni qimmiutillit ilaat qimminik paarsilluanngittarneq akiorniarlugu qimmeqarfik assiliissutikkut kommunimit nakkutigineqartalernissaat anguniarlugu atsiornernik katersisoqarpoq.
Qangaanerusoq qimmiutillit angerlarsimaffiup eqqaani qimmeqartarnikuusut ullumikkut amerlanerpaartaat qimmeqarfimmi inissisimapput. Qimmeqarfillu aqqusinertaarsuup tungaani inissisimavoq, oqaatigineqarporlu qimmiutillit maanna 38-it qimmeqarfimmiititaqartut.
Ikioqatigiinnikkut suleqatigiinnikkullu qimminik paarsilluarneq anguneqarusulluni atsiortsitseqattaartut tassaapput Navarana Lennert aamma Sara Berthelsen.

- 2013-ikkunnili qimmit illoqarfiup avataanut nuutsinneqarnissaat eqqartorneqalermalli inuusuttoqatikkalu tamanna ingasagalugu eqqartortarsimavarput. Kingornalu nuutsinneqalereermata serlersaarinerit, ikkatilliinerit, aportittut qimmillu imminnut qaninnermut uiartertut takussaaleraluttuinnarsimallutik. Tamakkua akiorniarlugit Sara Berthelsen atsiornernik katersiniartoq ikiorniarlugu aallartissimavunga, oqarpoq Navarana Lennert.

 

Atsiortitsineq

Arnat inuusuttut suliniuteqartut tapersersorneqarnissartik anguniarlugu internet aqqutigalugu atsiortsitsineq ingerlappaat. Neriuutigaat siunissami qimmiutillit kommunilu akunnerminni qanimut suleqatigiilluarumaartut, unalu interneti aqqutigalugu qimmeqarfik filmiliusernissaanut piumasut tapersersuisut atsiorsinnaassasut kaammattuutigaat: bit.do/qimmeqarfik-filmiliuserli

Suliniuteqartut Qeqqata Kommunianut suleqatiginnikkusullutik allagaqarsimapput.
- Maannakkut teknologi nutaaliaanermut imaaliallaannaq nakkutigineqarsinnaalissagaluarput, filmiliuutinik qimmeqarfik ikkussuiffigineqaleraluaruni. Mobiltelefonimi atorlugu filmiliuutinut attavinittoqarsinnaalernikuuvoq. Soorlu Sisimiuni umiatsiaaraatileqatigiit taamatut ingerlasut. Ukioq kaajallallugu ulloq unnuarlu nakkutigineqarsinnaalissagaluarput, qarnorluunniit sila taartigigaluarpat aamma, Navarana Lennert nassuiaavoq.

 

Paarsilluarneq

Qimminik paarsilluarneq tassaavoq qimmit alakkariaannaallugit nakkutiginnilluarneq, ullut tamaasa ukiukkut nerisitsineq, aasakkut ulloq allortarlugu nerisinneqarsinnaapput kisianni ullut tamaasa imermik pajunneqartarnissaat imariaannaanissaalluunniit pisariaqartoq qimussertartut kaammattuipput.

Navarana Lennert appanilu ilinniarnertik peqqutigalugu maanna Nuummi najugaqarput, naammasseriarunillu naatsorsuutigaat Sisimiunut uterunik maanna qimmeqarfiat illoqarfiup qeqqaniittoq qimmeqarfimmut nutaamut nuuttariaqassallugu oqaatigaa.

 

qimmit filmiliuserlik 950px 02

Qimmit ullut tamaasa nakkutigineqartarnissaat kaammattuutigineqarpoq. (ass./foto: Johannes Ujo Müller)

 

qimmit filmiliuserlik 950px 03

Navarana aappanilu ilinniarnertik pissutigalugu Nuummiipput, naammassigunillu qimmiutitik amerliartorteqqikkusuppaat. (ass./foto: Johannes Ujo Müller)

 

qimmit filmiliuserlik 950px 04

Assiliissutit atorlugit nakkutiginnissinnaaneq siunnersuutigineqarpoq. (ass./foto: Johannes Ujo Müller)